Albertus dei gratia Patauiensis episcopus ad perpetuam rei memoriam. Bone rei dare consultum et presentis habetur vite meritum et eterne remunerationis premium exspectatur. Sane venerande memorie domini Ru^edigerus et Wernhardus, predecessores nostri, ecclesiam parrochialem in Pulka nostre dyocesis venerabilibus et religiosis viris abbati et conventui Monasterii Scotorum in Wienna ac mense ipsorum ex legitimis et necessariis causis donarunt, appropriarunt ac vniuerunt, et hoc per bone memorie dominum fratrem Gwidonem titulo sancti Laurentii presbyterum cardinalem, tunc in partibus istis apostolice sedis legatum, exstitit confirmatum, prout in litteris dicti domini Wernhardi predecessoris nostri, quas vidimus et perlegi et examinari fecimus, plenius continetur. Quarum tenor dinoscitur esse talis. (Folgt die pag. 78, Nr. LXII abgedruckte Urkunde des Bischofs Wernhard von Passau vom Jahre 1287.) Nos igitur predictorum vestigiis inherentes vnionem, donationem ac appropriationem predictas ratas et gratas habemus et auctoritate ordinaria, quantum de iure efficatius possumus, approbamus testimonio huius scripti, nostri sygilli munimine roborati. Actum et datum Wienne anno domini millesimo CCC. vicesimo nono. III. kalend. Septembris.

Source Fulltext: HAUSWIRTH, Schotten (=FRA II/18, 1859) S. 183