Wir Graf Vlreich von Pfannberch veriehen offenlich mit disem prief vnd tv^on chunt allen den, die in sehent, horent oder lesent, die nu sint oder hernach chunftich werdent, daz wi^er hern Otten von Wyldungesmauer di gnade vnd di lieb getan habn, die Sechtzehen gantzev lehen vnd ein halbev hofstat cze veld vnd cze dorf, di da ligent ze Taellesprvnne, di er von vns ze lehen hat, daz wir diselben lehen vnd die halbev hofstat vnd swaz darczv^e gehort, czv^e samt im verlihen haben allen sein erben, baiden sunnen vnde To^echteren, die er hat oder noch gewinnet, damit allen iren frvmen furbaz ze schaffen, verchauffen, versetzen vnd gebn, swem si wellent, mit vnser hant vnd mit vnserm gu^etem willen an allen irrsal. Vnd sein ouch wir der vorgesprochen lehen vnd der halben hofstat cze Taellesprvnne vnd swaz darczv^o gehort, hern Otten von Wyldungesmauer vnd aller seiner||
erben, baider sunnen vnd Tochtern, die er hat oder noch gewinnet, oder wem sic die vorgeschriben lehen vnd halbev hofstat versetzent, verchauffent oder gebent, i^er recht lehenherr nach dez landes recht cze O^esterreich vnd gebn in darvber disen prief czv einem offem vrchunde versigelt mit vnserm Insigel. Der prief ist gebn ze Wienne nach Christes geburt drevtzehen hundert iar in dem acht vnd czwainczigi-stem iar darnach, an aller Heyligentag.

Source Fulltext: HAUSWIRTH, Schotten (=FRA II/18, 1859) S. 182-183