Ich Otte von Paumgarten vnd ich Agnes sein hausvrowe, vnd ich Sophey dez vorgenanten Otten Swiger, vnd ich Wilhalm vnd ich Hadmar von Paumgarten der egenanten vron Sophein Su^ene, wir vergehen vnd tvn chunt allen den, die disen brief lesent oder horent lesen, die nv lebent vnd hernach chu^enftich sint, daz wir mit vnser erben guten willen vnd gunst, mit verdachtem mv^et vnd mit gesampter hant, zv der zeit, do wr iz wol getun mochten, lauterleich durch got vnd durch aller vnser vodern sel willen vnd auch durch vnser selber sel hail willen ze hilf vnd ze Trost Recht vnd redleichen gegeben haben auf vnser vrawen alter datz den Schotten ze Wienne vnsers rechten aigens Sechs vnd fu^enftzich Emmer weins Perchrechtes, die da ligent ze Intzeinstorf enhalben dez Wiennerpergs, vnd zchen phenninge vnd dreitzehen schillinge wienner phenninge geltes, die da ligent daselbens ze Intzeinstorf auf weingarten vnd auf gestiften holden, vnd leit ze naechst der vrawen gu^et von Maernberch vnd des Chranichperger gu^ot von Mu^erekke. Ez sol auch der erber herre apt Mauritz datz den Schotten ze Wienne, oder swer apt nach im wirt, dez vorgenanten gutes recht stifter vnd sto^eraer sein. Ez sol auch der egenant herre apt Mauritz datz den Schotten ze Wienne vnd dev Samnvnge gemain dezselben Chlosters vnd alle ir nachchomen fu^erbaz mit der vorgenannten Gu^elt allen irn frumen schaffen, verchauffen, versetzen vnd geben, swem si wellen, an allen irresal. Vnd darüber durch pezzer sicherhait so setzen wir vns, ich Otte von Paumgarten vnd ich Agnes sein hausvrowe, vnd ich Sophey des egenanten Otten Swiger, vnd ich Wilhalm vnd ich Hadmar von Paumgarten vron Sophein sv^enne, vnd unser erben vnverschaidenleich vber di vorgesprochen gu^olt dem erbern herren apt Moritzen vnd der Samnvng gemain datz den Schotten ze Wienne vnd allen irn nachchomen zv rechtem gewer vnd scherm fu^er alle ansprach, alz aigens recht ist und dez landes recht ze Oesterreich. Vnd wand vrowe Sophey nicht aigens Insigils hat, davon so haben wir, ich Otte von Paumgarten vnd ich Agnes sein hausvrowe, vnd ich Wilhalm vnd ich Hadmar die Pruder von Paumgarten, fu^er vns vnd fu^er si In geben disen brief zv einem offen vrchunde vnd zv einem warn gezeuge diser sach versigilten mit vnsern Insigiln. Diser brief ist geben ze Wienne nach Christes gepurt dreuzehen hundert iar in dem dreizgisten iar darnach, an sant Phillips vnd sant Jacobs Tage.

Source Fulltext: HAUSWIRTH, Schotten (=FRA II/18, 1859) S. 187-188