Ich Erib, zden zeiten Richter ze Weyrberch, vergich offenbar mit disem brief vnd tun chunt allen den, di in sehent oder horent lesen, di nu sint vnd hernach chumftich werdent, daz ich mit wolverdachtem mu^ot vnd mit zeitleichem Rat weiser Leut gewechsselt han zden zeiten, do ich iz wol getu^on mocht mit Recht, mit dem Erbern Herren herrn Seifried, zden zeiten Pfarrer ze Ekchendorf, so beschaidenleich, daz ich im geben han, seinen Nachchomen vnd der Pfarr ze Ekchendorf zehent auf einem halben bestiften Lehen, da zden zeiten di Pevrinn vnd irev Chind aufsazzen. So hat er mir gegeben vnd meinen Eriben zehent auf einem halben Lehen, daz ist vberlendich vnd leit in meinem Paw ze Rekkendorf, daz weilen waz der Hedreinstorfer. Vnd ist daz geschehen mit meins Herren Hand, Bischof Albrecht von Pazzow. Vnd daz der Wechsel zwischen vns baiden ewichleich staet vnd vnzebrochen beleib,darvber gib ich vorgenanter Erib dem vorgenanten Pfarrer, seinen Nachchomen vnd der Pfarr ze Ekkendorf disen brief versigelt mit meins Herren Insigel, Bischofs Albrecht von Pazzow. Der brief ist geben, do von Christes gepurt waren dreutzehen hundert Iar darnach in dem ain vnd dreizkisten Iar, an dem Perichttag.

Source Fulltext: HAUSWIRTH, Schotten (=FRA II/18, 1859) S. 194