Albertus, dei gratia Patauiensis episcopus, dilectis in Christo Hermanno, plebano in Gawatz ecclesie nostre canonico, ac Pilgrimo de Praunstorf, officiali nostro infra Anasum, salutem in domino . . . Discretioni vestre committimus arcius iniungentes, quatenus ambo vel alter vestrum, prout super hoc fueritis requisiti, venerabilem fratrem nostrum Mauricium abbatem monasterii sancte Marie Schotorum ordinis sancti Benedicti nostre dyocesis, suo et eiusdem monasterii sui nomine, in corporalem possessionem ecclesie parrochialis in Pulka, ipsis et mense eorum per reuerendos patres quondam dominos Rudigerum et Wernhardum, episcopos Patauienses predecessores nostros, sub confirmatione reuerendi patris, fratris Gwidonis tytuli sancti Laurentii in Lucina presbyteri cardinalis tunc apostolice sedis per Alamaniam legati, nostraque ratihabicione et approbacione denuo subsecutis incorporate et annexe, vacantis ad presens per liberam resignacionem discreti viri Dietrici, quondam plebani ibidem, inducatis, facientes ipsi nomine quo supra de fructibus et prouentibus ac iuribus et obuentionibus vniuersis ad ipsam pertinentibus integre responderi iuxta indultam eis gratiam et continentiam litterarum inde confectarum contradictores et rebelles auctoritate nostra per censuram ecclesiasticam compescendo. In quorum testimonium sigillum nostrum presentibus est appensum. Datum aput sanctum Ypolitum anno domini millesimo trecentesimo tricesimo primo, ydus Julii.

Source Fulltext: HAUSWIRTH, Schotten (=FRA II/18, 1859) S. 196-197