Albertus, dei gratia Patauiensis episcopus, religiosis viris . . . abbati et conuentui monasterii sancte Marie Scotorum in Wienna ordinis sancti Benedicti nostre dyocesis salutem in omnium saluatore. Pia predecessorum nostrorum opera laudabiliter prosequentes ea gratiori affectu amplectimur, que pro religionis augmento ex ampliori deuotionis zelo dinoscimus processisse. Sane quia reuerendi patres domini quondam Rudigerus et Wernhardus, predecessores nostri episcopi Patauienses, pia erga vos intentione affecti, de consilio et consensu capituli Patauiensis, sub confirmatione reuerendi patris, fratris Guidonis tytuli sancti Laurentii in Lucina presbyteri cardinalis tunc per Alamaniam apostolice sedis legati, nostra etiam ratihabitione et approbatione postmodum subsecutis, ecclesiam parrochialem in Pulka eiusdem nostre dyocesis, in qua ius patronatus ad vos pertinere dinoscebatur, cum eam vacare contingeret, vobis et monasterio vestro predicto pro necessitatibus vestris releuandis et oneribus incumbentibus comodius supportandis tradiderunt et incorporauerunt, ipsam mense vestre in perpetuum annectendo, prout in litteris autenticis inde confectis plenius continetur. Nos iustis vestris supplicationibus liberaliter annuentes gratanter admittimus, vt corporalem possessionem eiusdem ecclesie, que per liberam resignationein discreti viri Ditrici, quondam plebani ibidem, in manibus nostris factam ad presens vacare dinoscitur, licite apprehendere valeatis, fructus et prouentus ipsius in vtilitatem vestram iuxta indultam vobis gratiam et litterarum predictarum continentiam conuertendo; prouiso tamen, quod cultus diuinus hactenus inibi obseruari consuetus cum hospitalitate solita ex hoc nullatenus minuatur ac onera incumbentia modo debito supportentur iuraque episcopalia ac queuis alia nobis seu quibusvis aliis debita illibata conseruentur, tradentes vobis presentes litteras, sigilli nostri appensione munitas, in testimonium premissorum. Datum Wienne anno domini millesimo CCC^o. Tricesimo primo, Ydus Julii.

Source Fulltext: HAUSWIRTH, Schotten (=FRA II/18, 1859) S. 195-196