Wir Chunrat der Wiltberher zv den zeiten Purgermaister vnd der Rat gemain der stat ze Wienne veriehen vnd tun chunt allen den, die disen brief lesent oder horent lesen, daz wir vnd her Jacob der Polle, zu den zeiten Chapplan vnd verweser vnser vroen Chappellen in dem Rathhaus ze Wienne, von allem chrieg vnd von aller ansprach, die wir von derselben Chappellen wegen gehabt haben hintz den Erbern Geystleichen Herren apt Hainreichen vnd dem Conuent des Chlosters vnser vro^en datz den Schotten ze Wienne vmb ainen weingarten, der da leit an dem Nuzperge, der weilent hern Merten Chapplan der vorgenanten Chappellen gewesen ist, den er vmb sein aygenhaft varunde gut gechauft het vnd den er demselben Chloster datz den Schoten geschaft hat, vnd vmb ander varunde gut, swie so daz genant ist, daz sein gewesen ist, also gelazzen haben, daz die vorgenanten Herren des Chlosters zv den Schoten ze Wienne ales daz, daz ze Recht die vorgenanten Chappellen angeho^ert, daz her Mert von derselben Chapellen versetzt vnd verchumert het, losen solten vnd der Chappellen geantbu^erten. Vnd darvmb, daz sev daz Recht vnd redleichen getan habent, so verzech wir vns mitsampt dem vorgenanten hern Jacoben dem Pollen allez Rechten vnd aller ansprache, die wir oder er gehabt mochten haben vnd vnser oder sein nachomen furbaz ewichleichen gehaben mo^echten, hintz dem egenanten weingarten oder hintz dem varunde gu^et, als vorgeschriben ist, mit vrchunde ditz briefs, den wir den oftgenanten herren vnd dem Chloster ze den Schoten ze Wienne gegeben haben versigelten mit vnser stat chlainem anhangunden Insigel, disen brief ze einem waren sitigen vrchunde versigelt. Diser brief ist gebn ze Wienne nach Christes geburde dreutzehen Hundert Iar darnach in dem drew vnd virtzigistem Iar, an sande Gerdrauten Tage.

Source Fulltext: HAUSWIRTH, Schotten (=FRA II/18, 1859) S. 241