Wir Chunrat von Gotes gnaden Bisscholf von Chiemsse, ich Rudolf, Ott, Andre, Fridreich, Jans vnd Rudolf, all prueder von Liechtenstain, vergehen vnd tuen chunt offenleich mit disem prief allen den, die in sehent oder ho^erent lesent, daz wir mit veraintem mu^et vnd mit gutem willen, nach erberr leut rat, mit vnserm liebem vettern hern Rudotten von Liechtenstain getailt haben vnsrev Ho^euser, die wir miteinander gehabt haben ze Wienn, ze Prukk vnd ze Gretzz. Dez erstem ist vnserm vettern vnd seinn Erben mit los vnd mit tailung geuallen an dem Haus ze Wienn der stochk mit dem czygeldach, mit den Chelern, der grossen stuben von vntten auf gantz vnd gar, der hof halber, als er ist gemercht vnd gemessen, vntzent an die press, die zwen stall vor dem garten, der prunn vnd der Gartt gantz vnd gar. Wir sullen auch in die zwai fensterr an der grossen stuben vnd daz ain fenster an der Gru^eben, die in vnsern tail des hofs gent, nicht verpawn. Vnd geit vns vnser Liber vetter her Ru^edotten ze ebentewern phenning fumftzich phunt Wienner munss vnd der wir gar vnd gentzleich von im gewert sein. Auch ist vnserm vetter hern Ru^edotten geuallen der tail an dem haus ze Prukk, der gemawert stochk gegen der Mu^er, vnd waz vor dem Turlen leit, Ga^erttel vnd das Chu^elhaus, halbe stallung dev nidrar, halber hof von den planchen vntzent an die mawern vor den stellen, vnd sol daz Hofto^er vnd der ganch auf daz Lau^ebel paidenthalben gemain sein. Vnd an demselben haus geit vns vnser vetter ze ebentewern Wienner phenning czehen phunt vnd hat vns auch der gantz vnd gar gewert. Auch ist vnserm Lieben vettern geuallen der tail an dem Haus ze Gretzz von der Chluft vnd dem Chreutz ob dem To^er, von dem gwelb die fumf gemawerte gadem, den stochk also gantzen von der Chluft vntzent an daz nider turel geleich, halben hof, vnd sol daz To^er vnd daz Turel gelaich paidenthalben gemain sein. Wir haben auch daselbs vnsern weingarten an dem Rorenpach getailt, ist vnserm vettern geuallen die Eben wei der press vntzent an den Tieffengraben, vnd darzv den Nidern weingarten mit holtz, mit velden vnd was darzv^e geho^ert. Den vorgnanten tail, als er mit ausgenomener red an disem prief ist verschriben, den loben vnd verhaissen wir mit vnsern trewn stet ze wehalten vnserm liebem obngenantem vettern hern Rudotten von Liechtenstain vnd alln seinen erben. Auch ist ze merchen, daz wir sein gepunden ze geben alle iar ierchleich von demselben Haus ze Wienn vier phunt phenning Wienner ze Gruntrecht den zwain Chlo^estern ze sand Larentzen vnd hintz sand Chlaren, vnd derselben phenning geit vnser vetter her Ru^edotten phenning zwai phunt Wienner von seinem tail, so geben wir von unserm tail desselben hauss zwai phunt phenning, vnd dieselben vier phunt phenning geit vnd dient man vns paidenthalben von dem Haus, daz hinden an vnser haus sto^esset, vnd daz der pharrer von Stillvrid inne hat. Auch haben wir noch miteinander ze Wienn, daz noch vngetailt ist, den Hof in der Lantstrass, ain phunt Geltz Wienner munss, daz auf dem haus gelegen ist, vnd daz Chu^enratz dez Wiertzz ist gebesen vnd daz wir nu inn haben, Ich Andre, Fridreich, Jans vnd Ru^edolf von Liechtenstain, vnd Sechs vnd dreissich phenning geltz haben wir miteinander auf der Hertzoginn haus. Daz vnserm liebem vettern daz alles stet vnd vnzerbrochen von vns vnd von vnsern Erben weleib, darvber so geben wir m disen vnsern offen prief gesigelt mit vnsern anhangenden Insigeln vnd mit vnserm lieben vrown vnd mu^etter vrown Elspeten von Liechtenstain anhangendem Insigel, darvnder wir vns verpintten mit vnsern trewn, Ich Andre, Fridreich, Jans und Ru^edolf von Liechtenstain, wann wir daselbens chain Insigel nicht haben gehabt. Der prief ist geben ze Wienn in der vasten dez nesten Montags nach Oculi dez suntags, vnd do man zalt von Christi gepurtt dreutzehen Hundert Jar vnd in dem Sechsten und vierzichistem Jar.

Source Fulltext: HAUSWIRTH, Schotten (=FRA II/18, 1859) S. 252-253