Ortolfus, dei gratia sancte Saltzburgensis ecclesie archiepiscopus apostolice sedis legatus, dilectis in Christo . . abbati, . . Priori et conventui monasterii Mulstatensis ordinis sancti Benedicti nostre dyocesis salutem in domino. Litteras sanctissimi in Christo patris et domini nostri domini Clementis diuina prouidencia pape sexti sub filo canapis vera ipsius domini pape bulla plumbea bullatas, non cancellatas, non viciatas nec in aliqua sui parte suspectas, prout decuit, reuerenter recepimus tenoris et continencie subscriptorum. Clemens episcopus, seruus seruorum dei, venerabili fratri Ortolfo archiepiscopo Saltzburgensi salutem et apostolicam benedictionem. Exigit tue sincere devocionis affectus, quem ad nos et Romanam geris ecclesiam, vt ea te gratia fauorabiliter prosequamur, per quam aliorum vota domino famulari desiderancium valeant adimpleri. Hinc est, quod nos tuis deuotis supplicacionibus inclinati fraternitati tue faciendi recipi hac vice duntaxat in tua ecclesia Saltzburgensi ordinis sancti Augustini et in singulis inonasteriis, prioratibus et locis aliis conuentualibus eiusdem sancti Augustini et sancti Benedicti ordinum tuorum ciuitatis et dyocesis singulas personas, cupientes in ecclesia, monasteriis, prioratibus et locis predictis sub regulari habitu virtutum domino famulari, quas ad hoc duxeris eligendas, dummodo persone ipse sint idonee et aliud canonicum non obsistat, si in ecclesia, monasteriis, prioratibus et locis prefatis certus canonicorum et monachorum numerus non habetur, vel etiam si hujusmodi numerus forsan ibidem existat et de ipso numero aliquis deest ad presens ex nunc, alioquin quam primum aliquern deesse continget, in canonicos et monachos et in fratres sibi juxta ipsorum ecclesie, monasteriorum, prioratuum et locorum consuetudinem exhiberi habitus regulares ipsasque singulas personas in ecclesia et singulis monasteriis, prioratibus et locis huiusmodi sincere in domino caritate tractari, contradictores auctoritate nostra appellacione postposita compescendo, non obstantibus quibuscumque statutis et consuetudinibus ecclesie monasteriorum, prioratuum, locorum et ordinum predictorum contrariis, iuramento confirmacionis sedis apostolice sev quacumque alia firmitate vallatis, aut si pro aliis in dictis ecclesia, monasteriis, prioratibus et locis scripta forsan apostolica sint directa, sev si archiepiscopo Saltzburgensi, qui est pro tempore, et dilectis filiis monasteriorum, prioratuum et locorum predictorum abbatibus, prioribus, prepositis ac capitulo ecclesie, nec non monasteriorum, prioratuum, et locorum predictorum conuentibus, aut quibusuis aliis communiter vel diuisim a predicta sit sede indultum, quod ad recepcionem vel prouisionem alicuius minime teneantur, quodque ad id compelli aut quod interdici, suspendi vel excommunicari non possint per litteras apostolicas non facientes plenam et expressam ac de verbo ad verbum de indulto huiusmodi mencionem, et qualibet alia prefate sedis indulgencia generali vel speciali, cuiuscumque tenoris existat, per quam presentibus non expressam vel totaliter non insertam effectus earum impediri valeat quomodolibet vel differri, et de qua cuiusque toto tenore habenda sit in nostris litteris mencio specialis, plenam et liberam concedimus tenore presencium facultatem. Datum Auinione II. nonas Januarii, pontificatus nostri anno secundo. Volentes igitur vti beneficio huiusmodi gracie a sede apostolica nobis facte dilectum in Christo Heintzlinum scolarem, natum Georii de Saltzburga, cui apud nos de probitatum meritis laudabile testimonium perhibetur, quique apud vos altissimo famulari desiderat, in quantum et sicut ex forma predictarum litterarum possumus, in vestrum et monasterii vestri monachum eligimus et in fratrem, monentes vos omnes et singulos et alios, quorum interest aut interit in futurum, quatenus dictum Heintzlinum infra sex dies, quorum duos pro primo, duos pro secundo, reliquos vero duos pro tercio et peremptorio termino et monitione canonica assignamus, recipiatis in vestrum monachum et in fratrem, facientes sibi regularem habitum, prebendam et cetera ad monochatum pertinencia secundum monasterii vestri consuetudinem exhiberi. Quod si forte premissa non adimpleueritis aut aliquid in contrarium feceritis vel mandatis nostris, ymo verius apostolicis, non parueritis cum effectu, in vos, abbatem, priorem et omnes et singulos monachos et vestrum quemlibet, monicionibus et mandatis nostris efficaciter non parentes, et alios quoscumque contradictores, qui quocumque modo impedimentum interposuerint publice vel occulte, ex nunc prout ex tunc. eadem canonica ammonicione premissa excommunicationis, conuentum vestrum suspensionis et monasterium vestrum interdicti in hiis scriptis sentencias promulgamus. Et quia pro premissis omnibus exequendis non possumus personaliter interesse, dilectis in Christo . . in Gmunda, . . in Lyserek et . . in Cha^etz ecclesiarum plebanis et cuilibet eorum in solidum super executione huiusmodi mandati nostri, ymo verius apostolici, tenore presentium committimus vices nostras, donec eas ad nos duxerimus reuocandas, in virtute sancte obediencie precipiendo mandantes, vt ipsi vel alter eorum, qui requisitus fuerit, ita quod alter alterum non expectet, infra sex dies post recepcionem presencium ad vos personaliter accedant, et litteras, moniciones, precepta, sentencias et processus nostros et alia supradicta vobis et cuilibet vestrum communiter vel diuisim et quibuscumque aliis in vestro conuentu vel alibi, vbi expedire viderint, notificare, intimare, denunciare, legere et publicare procurent, dictum Heintzlinum in possessionem monachatus jurium et pertinenciarum ipsius inducant et omnia alia et singula exequantur, que pro vtili expedicione presentis negocii cognouerint expedire, et quod vos et vestrum quemlibet et alios quoscumque mandatis nostris in hac parte non parentes vel quomodocumque impedimentum prestantes et ex hoc sentencias per nos latas, sicut predicitur, incurrentes excommunicatos publice nuncient et faciant ab aliis sub penis premissis diebus singulis, dominicis et festiuis, pulsatis campanis, candelis extinctis, publice nunciari. In cuius rei testimonium presentem processum mandauimus nostri sigilli munimine roborari. Datum Saltzburge XII. kalendas Julii, anno domini millesimo trecentesimo quadragesimo sexto.

Source Fulltext: HAUSWIRTH, Schotten (=FRA II/18, 1859) S. 254-256