Ich Nicla der Falbacher vnd Ich Elzbet sein Hauswrow wir veriechen mitsampt unsern Erben offenleich an disem prief allen den, die in lesent, horent oder sechent, die nv lebent vnd hernach chu^emftig sint, daz wir mit veraintem muet vnd guotem willen, ze der zeit, do wir ez wol getuen moechten, fuemf schilling Wienner phenning geltes rechtes aygens gutes, die gelegen sind auf einer Muel an dem Chaltengang pey der Swechent vnd vnser rechts Erib gewesen ist, verchauft haben dem Erbern Geystleichen Herren Apt Phylippen vnd dem Gotshaus vnser vrowen vnd der Schotten ze Wienn vmb achtzehen phunt Wienner phenning, der wir gar vnd gaenczleich gericht vnd gewert sein. Wir sein auch vnd vnser Eriben der egenanten fu^emf Schilling phenning geltes recht gewer vnd scherm fu^er alle ansprach, als aygens Recht ist vnd Landes Recht ist in O^esterreich, ez sey besu^echtes oder vnbesu^echts, swie ez genannt ist. Vnd daz diser chauf also staet vnd vnzebrochen beleib, darv^eber so gib ich vorgenanter Nicla von Falbach||
disen Brief zv aynem waren vrchu^ond versigelt mit meinem anhangvnden Insigel vnd mit der erbern weisen Rittern Insigeln hern Weichartes vnd hern Vlreiches pey den Minnern pruedern, di diser sach gezevg sind. Der Prief ist geben ze Wienn, do von Christes geburd ergangen waren dreuczehen hundert iar darnach in dem Sechs vnd virczigistem Jar, an sand Elzbeten Tag.

Source Fulltext: HAUSWIRTH, Schotten (=FRA II/18, 1859) S. 257-258