Ich Katrey, Andres Tochter des Smerstoezzels, dem got genade, vergich vnd tu^en chunt allen den, die disen prief lesent oder ho^erent lesen, die nu lebent vnd hernach chu^enftich sint, Daz ich mit gutem willen, mit verdachtem mv^et vnd nach meiner pesten vreunt rat, zu^e der zeit, do ich es wol getu^en mochte, vnd mit hern Benedicten hant, zu^e den zeiten Amman vnd Phleger der Schotten guet ze Wienne, verchauft han mein Haus, daz da leit datz der Herren Alsse, vnd ein Hofstat Weingarten hinden daran zenaehst Haugen Haus dem Platzinsgu^et, da man von dem egenanten meinem Haus alle iar dient den gaestleichen Herren datz den Schotten drey schillinge Wienner phenninge an sant Michelstage ze rechtem Gruntrecht vnd nicht mer, vnd ist auch mich dazselbe Haus vnd die Hofstat weingarten daran anerstorben von meinem Ohaim Jansen dem Chitz, dem got genade. Daz vorgenant Haus vnd die Hofstat weingarten hinden daran han ich recht vnd redleich verchauft vnd geben mit alle dem nutz vnd recht, als ich es in Purchrechtes gewer herpracht han, vmb Dreutzehenthalb phunt Wienner phenninge, der ich gar vnd gaentzleich gewert bin, dem erbern manne Leupolden dem Aeschel vnd seiner hausurowen vron Chunigunden vnd irn erben, fu^erbaz ledichleichen vnd vreileichen ze haben vnd allen irn frvmen damit ze schaffen, verchauffen, versetzen vnd geben, swem si wellen, an allen irresal. Vnd sein auch wir, ich vorgenantev Katrey vnd ich Syman der Smersto^ezzel ir veter vnd ich Katrey sein hausurowe vnd vnser erben, vnuerschaidenleich des vorgenanten Haus vnd der Hofstat weingarten hinden daran des egenanten Leupolts des Aeschel vnd seiner Hausurowen vron Chunigunden vnd irr erben recht gewern vnd Scherm fu^er alle ansprach, als Purchrechtes recht ist vnd des Landes recht ze O^esterreich. Waer aber, daz si fu^erbaz mit recht an demselben Haus vnd Hofstat weingarten hinden daran icht Chrieges oder ansprach gewonnen, swaz si des Schaden nement, daz suln wir in alles ausrichten vnd widerchern an alle ir mv^e vnd an allen irn Schaden, vnd suln auch si daz haben auf vns vnd auf allem vnserm gut, daz wir haben in dem Lande ze O^esterreich, wir sein lebentich oder tode. Vnd daz diser Chauf furbaz also staet vnd vnzerbrochen beleibe, vnd wand wir selber nicht aigens Insigils haben, darumb so geben wir in disen brief zu einer ewigen vestnunge diser sache versigilt mit des vorgenanten hern Benedicten Insigil der Schotten amman vnd mit hern Jansen Insigil von Segberch, die wir des gepeten haben, daz si irev Insigil zu einem gezeuge an disen brief gehangen habent. Diser brief ist geben ze Wienne nach Christes gepurt dreutzehen Hundert iar darnach in dem fumftzgisten iar, an sant Michels Tage.

Source Fulltext: HAUSWIRTH, Schotten (=FRA II/18, 1859) S. 269-270