Ich Wolfganch vnd ich Clemens vnd ich Ot, Otten sven von Altenburch, wir veriehen vnd tuen chunt mit disem prief allen den, die in lesent oder horent lesen, die nu lebent vnd hernach chunftich sint, daz wir nach vnser besten frivnt Roat vnd zv der zeit, do wir is wol getun mochten, gemacht vnd geben haben zue vnser swester vrovn Elsbeten, Ottn tochter von Altenburch, dem got gunad, vnserm swager Dietmaren dem Weidenaer zu^e rechter haimsteu^er vnd zu^e morgengab nach des Landes recht ze Osterreich vier phunt Wienner pfenninge geltes, der gelegen ist ainphunt Geltes ze Staineprvnne vnd ist lechen von dem erbern herren hern Grof Chunraten von Schavnberch, vnd ochtzen schilling geltes zue Stuephreich vnd sind lechen von dem erbern herren hern Charlein dem Ga^erlaser, vnd ain phunt geltes ze Hargensee vnd ist lechen von dem erbern herren von Pergaw, vnd ain zehent zu^e Straiffinge auf fvnf ganzen lehen ze velde vnd ze dorfe vnd ist lechen von den erbern herren von Ebersdorf, dieselbe vier phunt geltes vnd den zehent, alz vor verschriben ist an disem prief, geb wier Dietmaren dem Weidenaer vnserm swager zu^e vnser swester vrovn Elspeten zu^e rechter haimsteu^er vnd zu morgengab nach des landes recht ze Ostereich, also mit auzgenamer red, wer daz, daz vnser swester nicht wer vnd an erben sturb, des got nicht geb, so schol er daz for verschriben gu^et inhaben vnverchumert vnz an siennen tot, dan noch seinem tot, so schol iz herwider erben vnd gevalen auf vns vnd auf vnser erben. Wer auer daz, daz siv chind miteinander gevvnen, do sol daz gu^et beleiben noch yr payder tot, iz sein sv^en oder tohter, vnd sezzent auch wier vns zu^e rehttem scherm darvber, alz man haimsteu^er vnd margengab ze reht scherm schol. Wer auer daz, daz im mit reht doran iht abgieng, daz sol er haben auf vns vnd auf allem dem, vnd wier haben in dem land ze Ostereich, wier sein lebentich oder tod. Dorvber sezzent wier vns, ich Trast vnd ich Niclas von Huntzhaim, Dietmaren dem Weidenaer zu^e rehtem scherm vnd gever also mit auzgenamer red, wer daz, ob ym an vnser vetern icht abging, alz vorverschriben ist an disem prief, daz schol er haben auf vns vnuerschaidenleich vnd auf allem dem, wier haben in dem land ze Ostereich, wier sein lebentich oder tot. Daz disev red, haimsteur vnd margengab stet vnd vnzebrochen belieb, darvber geb wier, ich Wolfganch vnd ich Clemens vnd ich Ot, Dietmaren dem Weidenaer vnserm swager zu^e eim offen vrchu^ent diser sach disen prief, wan wier selb nicht aigern Insigil haben, so pint wier vns stet ze haben allez, daz verschriben ist an disem prief, vnder meiner vetern Insigil Trast vnd Niclas vnd Meinharts vnd mit Olbers insigil des Moyker, die diser sach zeuch sint mit yr Insigilen. Diser brief ist geben nach Christes purd dreuzchen hundert Jar darnach in dem fumftzigisten Jar, an sand Matheus abent vor sand Michelstag.

Source Fulltext: HAUSWIRTH, Schotten (=FRA II/18, 1859) S. 268-269