Ich Swester Kathrey die Merinne von Leizze, zu den zeiten Maistrinne, vnd ich Swester Margret, zu den zeiten Priorinn, vnd der Convent gemain in sand Angnesens chloster dacz der Himelporten ze Wienn wir vergehen vnd tun chunt allen den, di disen brief lesent oder horent lesen, di nu lebent vnd hernach kunftig sint, Das wir vns mit dem hochwirdigen geistlichen herren Abtt Clementen vnser frawen chloster dacz den Schotten ze Wienn vnd mit dem Conuente gemain desselben chlosters lieplichen vnd frewntlichen verricht vnd verebent haben vmb den krieg vnd ansprach, den wir ee miteinander gehabt haben nur allain vmb das gruntrecht, daz wir haben in der Lanntstrazz vnd in der Hirspewnt ze Wienn, wie so das genant ist, also das wir, oder wer dasselb gruntrecht nach vns besiczt, ainen iglichem Abtt vnser frawen chloster dacz den Schotten ze Wienn von demselben grvntrecht furbas alle Jar dienen vnd raichen suln zwen vnd drey schilling Wienner phenninge ze gruntrecht ze zwain tegen, sechczig phenning an sand Michelstag vnd zwen vnd dreissig phenning an sand Jorigen tag, mit allem dem nucz vnd rechten, als man ander gruntrecht dient in der Stat ze Wienn, vnd wenn in der dinst versessen wird, so suln si oder ir anwalt dann furbas mit vnserm gutem willen an furbot vnd an chlag gewalt vnd recht haben, selber darumb ze phennden, als verr, das Si irs versessen gruntrechts verricht vnd gewert werden. Vnd suln auch wir, die geistlichen frawen dacz der Himelporten ze Wienn, des egenanten gruntrechts alle selber Stiffterinn vnd Storerinn sein, wenn des durft geschicht, vnd sol vns ein iglich Abtt des chlosters dacz den Schotten ze Wienn daran dhain irrung nicht tun weder vmb vil noch vmb wenig. Vnd des zu vrchunde geben wir in ich obgenante Swester Kathrey die Merinne von Leizz, zu den zeiten Maistrinn, vnd der Conuent gemain in sand Angnesen chloster dacz der Himelporten ze Wienn disen brief versigilt mit vnsern Insigiln. Der brief ist geben ze Wienn nach Christes gepurde dreuczehenhundert Jar darnach in dem fumf vnd fumfczigisten Jar, des nachsten Phincztags vor Phingsten.

Source Fulltext: HAUSWIRTH, Schotten (=FRA II/18, 1859) S. 285-286