Ich Niclas der Rogen vnd ich Katrey sein hausvrow wir veriechen mitsampt vnsern Eriben offenleichen an disem Brief vnd tun chund allen den, di in sechent, horent oder lesen horent, di nu lebent vnd hernach chunftig sind, Daz wir mit guetem willen vnd mit verdachtem muet vnd nach vnser pesten vreunt rat ayn Jeuchart achers, daz gelegen ist ze Leupolczdorf auf dem v^eberlend vnd ist emaln vnser vreyz aygen gewesen, daz hab wir verchauft mit aygenschaft mit alle dem beschaiden manne Larenczen ze Foelderndorf vnd Reychkarten seiner hausvrowen vnd ir payder Eriben vmb vir phunt Wienner phenning, der wir gar vnd gaenczleichen gericht vnd gewert sein mit beraitem gelt. Vnd di vorgenanten aygenschaft, dev hat der egenant Larencz vnd sein Eriben mit gesampter hant gemacht vnd gegeben dem wirdigen Goteshaus vnser vrowen vnd den Schotten ze Wienn also mit auzgenomer red, daz er Larencz vnd sein Eriben furbaz alle iar an sand Michelstag zwen Wienner phennig ze purchrecht davon dienen sollen, als ander v^eberlendes recht ist in O^esterreich vnd niht mer. Auch sol der vorgenant Larencz vnd sein Eriwen mit dem vorgenantem Jeuchart achers allen iren frum schaffen, verchauffen, verseczen vnd geben, swem sev wellen, an allen irresal. Vnd ob im Larenczen vnd seinen Eriben daran icht abgieng mit recht, daz sullen sev haben auf vns Niclan dem Rogen vnd allen sein Eriben vnuerschaidenleich vnd auf allem dem guet, daz wir haben in dem Lande ze Osterreich, wir sein lemtig oder Tod. Vnd daz diser chauf furbaz also staet vnd vnczebrochen beleib, des gib ich egenanter Nicla der Rogen mitsampt mein Eriben dem vorgenantem Larenczen vnd seinen Eriben disen prief versigelt mit meinem anhangvndem Insigel vnd mit des Erbern mannes Insigel Jansen des Syrnicher, der diser sach geczeug ist mit seinem Insigel. Der Prief ist geben nach Christes geburd vber dreuczenhundert Jar darnach in dem acht vnd fumfczigistem iar, an sand Vrbans Tag.

Source Fulltext: HAUSWIRTH, Schotten (=FRA II/18, 1859) S. 296-297