Ich Leupolt der Strobel von Velsperch, zu den zeiten Statschreiber ze Wienne, vnd ich Katrey sein Hausurow Wir vergehen vnd tun chvnt allen den, die disen brief lesent oder ho^erent lesen, die nu lebent vnd hernach chu^enftich sint, daz wir mit vnser Erben gutem willen vnd gunst, mit verdachtem muet vnd mit gesampter hant, zu der zeit, do wir es wol getun mochten, vnd mit vnsers perchherren hant des erbern mannes hern Hainreichs des Straicher, zu den zeiten Hofmaister ze Dornpach, verchaufft haben vnsern weingarten, gelegen an dem Alssekk, dez ein halbs Jeuch ist, zenaechst Fridreichs weingarten dez Mergeb, davon man auch alle iar dient in den Hof ze Dornpach fu^emf vnd zwainczich Wienner phenning fu^er perchrecht vnd drey helbling ze voitrecht vnd nicht mer. Denselben weingarten, der vns von erbern Laeuten gesprochen vnd beschaiden ist fu^er alle ansprach vnd vodru^enge, die wir gehabt haben hintz Jansen von Steg, mein vorgenanten Katrein vater, vmb alle die Gu^eter, die mein Muter vrow Agnes, der Got genade, hinder ir lazzen hat, haben wir Recht vnd redleichen verchaufft vnd geben mit alle den nutzen vnd rechten, alz wir in vnuersprochenlichen in perchrechts Gewer herpracht haben vnd alz er von alter herchomen ist, vmb fu^emftzich phunt Wienner phenning, der wir gar vnd ga^entzleichen verricht vnd gewert sein, dem vorgenanntem meinem Vater hern Jansen vom Steg vnd seinen Erben, fu^erbas ledichleichen vnd vreileichen ze haben vnd allen irn frumen damit ze schaffen, verchauffen, versetzzen, schaffen vnd geben, swem si wellen, alz in daz allerpest wol chu^emt vnd fu^egt an allen irrsal. Vnd sein auch wir, ich vorgenanter Leupolt von Velsperch vnd ich Katrey sein hausurowe vnd vnser Erben, vnuerschaidenlichen dez egenanten weingarten dez vorgenanten hern Jansen vom Steg vnd seiner Erben, oder swem er denselben weingarten schafft oder geit, recht Gewern vnd Scherm fu^er alle ansprach, als perchrechts recht ist vnd dez Landes recht ze O^esterreich. Get in fu^erbas mif Recht daran icht ab, daz suln si haben auf vns vnuerschaidenlichen vnd auf allem vnserm Gut, daz wir haben in dem Lande ze O^esterreich, wir sein lebentich oder Tode. Vnd daz diser Chauf fu^erbas also staet vnd vntzerbrochen beleib, darvmb so geben wir in disen brief zu einer Ewigen vestnunge diser Sache versigiltn mit vnserm Insigil vnd mit dez obgenanten vnsers perchherren insigil hern Hainreichs dez Straicher vnd mit Jacobs insigil dez Löffler, purger ze Wienne, der diser sache getzeug ist mit seinem Insigil. Der brief ist geben ze Wienne nach Christes Geburt drewtzehen Hundert Jar darnach in dem acht vnd fu^emfczigistem iar, an sant Cholmans Abent.

Source Fulltext: HAUSWIRTH, Schotten (=FRA II/18, 1859) S. 297-298