Ich Wernhart von Meichsaw vnd Ich Agnes sein Hausfraw vnd Ich Jans von Meichsaw ir bayder Sun wir veriechen vnd tun chunt allen den, die disen brief lesent oder ho^erent lesen, die nu lebent vnd hernach chu^enftich sind, daz wir mit unser erben gueten willen vnd gunst, mit verdachtem muet vnd mit gesampter hant vnd nach vnser pester vreunt Rat, zu der zeit, da wir es wol getu^en||
mo^echten, recht vnd redlich ze einem Purchrecht verchaufft vnd geben haben den erbarn La^ewten der gemain ze Staemestorff vnd allen iren nachchomen, die dazselb dorf nach in besizent, vnsers rechten aigens vnser Holz vnd vnser Wayd, alles mit grund mit alle, gelegen daselbes zu Stamestorff vnd haisset der Chueparth mit allen den nuzen vnd Rechten, als wir dazselb holz vnd die wayd gechauft haben von vnserm swager hern Albern dem Stuchsen von Trautmanstorf, vnd als wir es in aygens gewer herpracht haben, umb Hundert Phunt vnd vmb Vier vnd dreizzig Phunt wienner phenning, der vns die vorgenanten La^ewt die gemain ze Stamestorf gar vnd gaenzlich gewert habent, also das Sy vnd alle ir nachchomen, die das vorgenant dorf ze Stamestorf nach in besizent, daz obgenant Holz vnd die Wayd mit grund vnd mit alle fu^erbas Ewigleich von vns vnd von vnsern Erben zu einem Rechten Vberlentischen Purchrecht haben suln, vnd suln vns alle Jar davon dienen vnd geben nur Zweliff wienner phenning an sant Jorigen Tag ze einem Rechtem Purchrecht mit alle dem nuz vnd Rechten, als man ander v^eberlentische Purchrecht in dem Lande ze Osterreich dient vnd nichts mer. Vnd suln auch wir noch vnser Erben chainerley ander dienst noch Sache, wie die genant sint, an sew noch an yr nachchomen mu^eten noch vordern. Das luben wir in an alles geuar staet ze haben vnd ze laisten mit vnsern Trawen. Es suln auch die vorgenante La^ewt die gemain ze Staemestorf vnd alle yr nachchomen daz vorgenant holz vnd die wayd mit grunt, mit allen den nuzen vnd rechten, alz vorgeschriben stet, fu^erbas Ewigleich Ledigleich vnd vreileich haben, niezzen vnd nuzen vnd allen iren fromen damit schaffen, wie in daz aller best fuegt oder geuellet, an allen irsall, mit dem dienst vnd mit den Rechten, als auch vor an disen brief geschrieben stet. Vnd ze einer bezzern sicherhait so sezen wir vns, Ich Wernhart von Meichsaw vnd Ich Agnes sein Hausuraw vnd ich Hans von Meichsaw ir baider Sun, vnd alle vnser Erben vnuerschaidenleich v^eber daz vorgenant holz vnd vber die wayd der oft genanten gemain ze Stamestorf vnd allen iren nachchomen ze rechten gewern vnd Scherm fu^er alle ansprach, alz Purchrechts Recht ist vnd des Landes Recht ze O^esterreich. Wer aber, daz Sy fu^erbas mit Recht an demselben holz vnd an der wayd icht chrieges oder ansprach gewunen, waz Sy dez Schaden nement, daz suln wir in alles auzrichten vnd widerchern an allen iren Schaden, vnd suln auch Sy daz haben auf vns vnuerschaidenleich vnd auf allem vnserm guet, daz wir haben in dem Lande ze O^esterreich, wir sein lebentich oder tod. Vnd daz diser Chauf fu^erbas also stet vnd vnzerbrochen beleibe, darv^eber so geben wir, Ich Wernhart von Meichssaw vnd Ich Agnes sein Hausuraw, in disen brief zv einem waren vrchvnd vnd ze einer ewigen vestnung diser sache versigilt mit vnsern baiden Insigiln vnd mit meiner obgenanten Wernharts zwair bru^eder Insigiln hern Stephans von Meichsaw, obrister Marschalich in O^esterreich, vnd hern Hainrichs von Meichsaw, vnd mit mein Egenanten Agnesen zwair Vettern Insigiln herren Erkhenprechts vnd Marchharts der bru^eder von Mistelbach, die dizs Chaufs vnd diser sach gezeug sint mit iren Insigiln. Vnd wand Ich Hanns von Meichsaw selber nicht aigens Insigils han, so verpint ich mich mit meinen Trawen vnder der vorgeschriben Insigiln alles das stat ze haben vnd ze laisten, daz vorgeschriben stet. Der brief ist geben ze Wienne nach Christes geburt Drewczehen hundert Jar darnach in dem Newn vnd funfzigisten Jar, den achten Tag nach dez heilligen Chrewzs Tag, als es funden wart.

Source Fulltext: HAUSWIRTH, Schotten (=FRA II/18, 1859) S. 299-301