Ich Eberhart von Chappelln Hauptman dacz Ens vnd ich Jans von Chappelln sein veter wir veriehen offenleich mit dem prief vnd tun chund allen den, di in sehent, lesent oder horent lesen, Daz wir mit wolbedachtem müt vnd mit gutleichen willn vnd gunst aller vnserr Erben zv der czeit, do wir ez wol machten getun, geben haben den geystleichen herren dem Apt vnd dem Conuent cze Paumgartnperg vnd alln irn nachchömen Lautterleich durch got, vns selben vnd vnsern vodern vnd vnsern nachchömen zv einem Ewigen selgraet die gotesgab vnd di Chirchen dacz Gumppendorf, ewikleich ze haben mit allev di vnd darzv gehört, also beschaidenleich, daz auf derselben Chyrchen ze Gumppendorf czwen prister irs Ordens auz irm Chlöster ewichleich sitzen schullen vnd diselben Chyrchen mit dem Gotzdienst vnd allev Gotz-E selber davon raichen schullen nach der gwonhait der Christenhait. Darczv offen wir auch, daz ich egenanter Eberhart von Chappelln Hauptman dacz Ens vnd ich vorgenanter Jans von Chappelln vnd nach vns all vnser Erben der obgenanten Chyrchen ze Gumppendorf schullen ir Erbvogt sein vnd schullen daz tun nur lautterleich durch got. Darvmb daz den erbern geystleichen herren, dem apt vnd der Samnung ze Paumgartnperg vnd alln irn nachchomen, die Red vnd die sach staet vnd vnuerchert beleyb von vns vnd von allen vnsern Erben nach vns, geben wir In, ich offtgenanter Eberhart von Chappelln vnd ich egenanter Jans von Chappelln, den prief zu einem ewigen vrchund vnd zv einer ewigen bestaetung der sach versigelten mit vnser paiden auhangvnden Insigeln. Der prief ist geben an dem Svntag ze mittervasten, do man czalt von Christes gepurd Drevczehen Hundert Jar vnd in dem Sechtzkisten Jar.

Source Fulltext: HAUSWIRTH, Schotten (=FRA II/18, 1859) S. 307