Ich Niclas der Chlokchler vnd ich Kathrei sein hausurowe Wir vergehen vnd Tun chunt allen den, die disen prief lesent oder ho^erent lesen, di nu lebent vnd hernach chunftig sind, Daz wir mit aller vnser erben gutem willen vnd gunst, mit verdachtem mut vnd mit gesampter hant ze der zeit, do wir es wol getun machten, vnd mit vnsers Pergmaisters hant des erbern manns hern Ottens des Tanpruker, ze den zeiten Amptman des Chlosters ze Newnburch, recht vnd redlichen verchaufft haben vnsern weingarten, gelegen ze Otakchring niderhalb der Chirhen, des drew Virtail eins Jeuchs sind, der do haist der Veyal vnd der do leit zenast des Abbts weingarten von den Schotten, vnd do man von dem obgenanten vnserm weingarten alle Jar dient dem Chloster ze Newnburch achthalb virtail weins ze Perchrecht vnd fvmfthalben Wienner phenning ze voitrecht vnd nicht m er. Den vorgenanten vnsern weingarten haben wir verchauft vnd geben mit alle den nutzen vnd Rechten, als wir in vnuersprochenlieben in Perchrechts Gewer herpracht haben, vmb Zway vnd fumfczikch phunt Wienner phenning, der wir gar vnd genczlichen verricht vnd gewert sein, dem Erbern mann Mathesen dem Pirbaumer vnd vrown Elzbeten seiner hausurown vnd ir baider Erben, furbas ledichleichen vnd vreilichen ze haben vnd allen irn frumen damit ze schaffen, verchauffen, verseczen vnd geben, swem seu wellen, an allen chrig vnd irrsal. Wir sein auch vnuerschaidenlichen mitsampt vnsern Erben des vorgenanten weingarten ir recht Gewern vnd scherm für alle ansprach, als Perchrechts Recht ist vnd des landes Recht in Österreich. Get in firbas daran icht ab mit Recht oder ob si mit Recht icht Chriegs oder ansprach daran gebunnen, von swem daz wer, daz schullen wir in alles ausrichten, ablegen vnd widerchern an allen irn schaden. Vnd schullen si daz vnuerschaidenlich haben auf vns vnd auf allem vnserm Guet, daz wir haben in dem Lande ze Osterreich, wir sein lebentig oder Tod. Das diser Chauf fürbas also stet sei vnd vnczebrochen beleibe, vnd wenn wir selber nicht aigens Insigils enhaben, darüber so geben wir In disen brief ze einem warn vrchund vnd ze einer Ewigen vestigung diser sache versigilt mit des Pergmaister Insigil des obgenanten erbern manns hern Ottens des Tanpruker vnd mit der erbern Lawt Insigiln hern Michels des Vierdungs, ze den zeiten Judenrichter ze Wyenne, vnd hern Fridreichs von Gundreinsdorf, purger ze Wyenne, di wir des vleizzichleich gepeten haben, das sev diser sach zewgen sind mit irn Insigiln, vnd verpinden auch vns mit vnsern trewn vnder die gegenbürtigen Insigiln, alles daz genczlich stet ze haben vnd ze laysten, daz vor an disem brief geschriben stet. Der brief ist geben ze Wyenne nach Christi Gepürd drewczehen Hundert Jar darnach in dem Sechczigistem Jar, des nasten Vreytags nach sand Pauls Tag, als er bechert ward.

Source Fulltext: HAUSWIRTH, Schotten (=FRA II/18, 1859) S. 305-306