Gotfridus, dei gratia Patauiensis episcopus, omnibus imperpetuum. Deuotis ac religiosis et hiis precipue, qui spreta mundi gloria et terrenorum oblectacione contempta sub rigore monastico virtutum domino iugiter famulantur, libenter specialis favoris subsidia impendimus, vt per illorum merita et pietatis opera, que per illos fiunt, crescat multipliciter nostra salus et diuinus cultus salubriter nostris temporibus augeatur. Sane, cum dilecti in Christo abbas et conuentus monasterii in Paumgartenperg ordinis Cysterciensis nostre diocesis pro sustentacione sua necessaria et hospitalitate tenenda ac aliis indigenciis defectus notabiles paterentur, nobis humiliter supplicarunt, vt ecclesiam parrochialem sancti Egidii in Gumpendorf dicte nostre diocesis ad presentacionem ipsorum ex donacione juris patronatus per nobiles viros Eberhardum et Johannem de Cappella eisdem facta pertinentem, pro huiusmodi defectibus submouendis et aliis oneribus comodius supportandis mense ipsorum annectere, incorporare et vnire graciosius dignaremur, nos illorum deuotis et instantiuis peticionibus fauorabiliter inclinati, prefatam parrochialem ecclesiam mense ipsorum imperpetuum incorporamus, annectimus et vnimus, ita, quod post annexionem et vnionem huiusmodi, cedente vel decedente eiusdem ecclesie rectore seu ipsa ecclesia quouis alio modo vacante, liceat abbati dicti monasterii, qui pro tempore fuerit, et ipsius conuentui auctoritate propria, cuiusquam alterius licencia vel assensu minime requisitis, eiusdem ecclesie possessionem apprehendere et illam in vsus predictos perpetuo retinere ac deinceps per vnum sacerdotem ex fratribus dicti conuentus, qui tamen ad arbitrium eorundem abbatis et conuentus mutari et amoueri valeat quandocumque, ipsam inofficiare, regere et gubernare, qui nobis nostrisque successoribus pro petenda et accipienda a nobis et nostris successoribus animarum cura perpetuo presentetur, qui eciam personaliter in illa resideat et continue socium eiusdem professionis et ordinis secum teneat sacerdotem, reseruatis nichilominus pro duobus sacerdotibus huiusmodi de ipsius ecclesie prouentibus, fructibus, et obuencionibus porcione congrua, ex qua comode sustentari possint, et qua mediante frater dicti conuentus pro gubernatore et rectore antedicte ecclesie deputatus, hospitalitatem tenere, procuraciones papales et legatorum ac nunciorum sedis apostolice et quorumcumque aliorum et singula et omnia iura episcopalia, que lege diocesana et iurisdiccionis nobis et successoribus nostris iuxta consuetudinem patrie dinoscuntur competere, persoluere valeat aliaque incumbencia sibi et sepedicte parrochiali ecclesie onera supportare. In quorum testimonium euidens et certitudinem pleniorem presentes mandauimus fieri litteras appensionibus nostri et venerabilis nostri capituli sigillorum communitas. Datum Patauie XVI. kalendas Aprilis, anno domini millesimo trecentesimo sexagesimo.

Source Fulltext: HAUSWIRTH, Schotten (=FRA II/18, 1859) S. 308-309