Ich Jacob der Gastner vnd ich Anna sein hausfraw vnd all vnser erben Wir vergehen vnd tuen kunt allen den, die den brief lesent oder hören lesen, die nu lebent vnd hernach kuemftig sind, daz wir mit gueten willn, mit verdachtem mut vnd mit gesambter hant, ze der zeit, da wir es wol getuen mochtten, vnd mit willen vnd gunst vnsers genedigen Herren des Hochgeporn fuersten Hertzog Albrecht ze Österreich, ze Steyr, ze Kernnden vnd ze Chrain, Graf ze Tyrol etc. verchaufft haben vnsers rechten Lehens, das wir von im ze lehen gehabt haben, gantzen Zehennt auf den guetern hernach geschriben, grossen vnd klain, ze veld vnd ze dorff, es sei gestifft oder vngestifft, versucht oder vnversucht, wie so das genant ist, des ersten auf Sibenthalben virtailln lehens, gelegen ze Pirichenwort vnd auf drithalbn viertailln, gelegen ze Gawnestorf, vnd haisset auf dem Aigen, vnd datz dem Dorfflein auch auf drithalben viertailln lehens, vnd Sechs schilling vnd Sechs vnd Zwaintzig phenning wienner munzze geltes, gelegen ze Gaunestorf auf vberlent, di man jerleich dient, halb an sand Michelstag vnd halb an sand Jorgentag. Daz vorgenant gu^et Zehent vnd phenning gult haben wir recht vnd redleich verchaufft vnd geben mit allen den nu^etzen vnd rechtten, als wir es in lehens gewer herpracht haben, umb Siben vnd Zwaintzig phunt wienner phenning, der wir gantz vnd gar gewert sein, dem erbern manne Leuppoltn dem Malczer, zu den zeiten Richter ze Gaunestorf, der das vorgenant gut gechaufft hat, zu vnser frawen fruenmesse daselbens ewichleich dapei zu beleiben an allen Irrsal, wand der obgenant vnser genediger Herre Hertzog Albrecht durch Got vnd durch seiner sel hail willn die aigenschaft desselben gu^etes dartzu^e gegeben hat. Vnd seinn auch wir, Ich egenanter Jacob der Gastner vnd ich Anna sein hausfraw vnd alle vnser erben, unuerschaidenleich des vorgeschriben gu^etes, Zehents vnd phenninggult, als vorgenant ist, der egenanten fruemesse vnd aller der, die ir verweser sind, recht gewer vnd Scherm fur alle ansprach, als Lehens recht ist vnd des Lanndes recht ze Osterreich. Wer aber, daz in an demselben gut mit recht icht abging, oder ob si mit recht icht kriegs oder ansprach daran gewonnen, von wem das wer, was si des schaden nement, das sullen wir in alles ausrichtten vnd widerchern an allen irn Schaden, vnd sullen auch si das haben auf vns vnd auf allem vnserm gut, das wir haben in dem Lannde ze Osterreich, oder wa wir es haben, wie das genant ist, wir sein lebentig oder tode. Vnd das der chauff fu^erbas also stet vnd vntzerbrochen beleibe, daruber so geben wir in den brief ze einem warn vrchund der sache versigilten mit vnserm Insigil vnd mit Jannsen Insigil an dem Chienmarkcht, purger ze Wienne, den wir des gepeten haben, das er der sache getzeuge ist mit seinem Insigil. Der brief ist geben ze Wienne nach Christes gepurd dreuzehen hundert Jar darnach in dem Newn vnd sechtzgisten Jare, des negsten Eritags vor Phingsten.

Source Fulltext: HAUSWIRTH, Schotten (=FRA II/18, 1859) S. 333-335