Ich Hanns der Tanner und all mein Erben vergehen vnd tuen chunt allen den, die den brief lesent oder hoerent lesen, die nu lebent vnd hernach chunftig sint, das wir mit guetem willen, mit verdachtem muet, ze der zeit, do wir es wol getun machten, vnd mit vnsers Lehenherren hant, des erbern herren hern Hannsens von Sunnberch, Recht vnd Redleichen verchauft vnd geben haben vnsers rechten Lehens, das wir von im vnd seinem prueder Fridreichen von Sunnberch ze Lehen gehabt haben, vnsern halben dorfczechent ze Mittern-Grueb vnd vnser viertail zechent ze Obern-Grueb, weinczechent vnd traidczechent, grozzen vnd chlainen, ze velde vnd ze dorff, es sei gestift oder vngestift, versucht oder vnuersuecht, oder swie so das genant ist, mit alle den nuczen vnd rechten, als wir denselben zechent gechauft haben von vnsern Vetern Eberharten vnd Vlreichen den Tannern vnd als wir in in Lehens gebêr herpracht haben, vmb Sechs vnd achczig phunt wienner phenning, der wir gancz vnd gar gebert sein, Jörgen dem Floyt von Stainawprunn vnd seinen erben, furbas Ledichleich vnd vreyleich ze haben vnd allen irn frumen damit ze schaffen, verchauffen, verseczen vnd geben, wem sew wellen, an allen irresal. Vnd pin auch ich egenanter Hanns der Tanner mitsampt meinen erben vnuerschaidenlich des vorgenanten zechents ir recht gebeˆr vnd scherm für alle ansprach, als Lehens recht ist und des Landes recht ze Osterreich. Wer aber, das in an dem vorgenanten zechent mit recht icht abgieng, was si des schaden nement, das sullen wir in alles ausrichten vnd widerchern an allen irn schaden, vnd sullen si das haben auf vns vnd auf allem vnserm gut, das wir haben in dem Lande ze Osterreich oder swo wir es haben, wir sein lebentig oder tod. Vnd das der chauf furbas also stêt sey vnd vnezebrochen beleib, daruber so gib ich vorgenanter Hanns der Tanner fur mich vnd fur alle mein erben in den prief ze ainem warn vrchund der sach versigelt mit meinem Insigel vnd mit des vorgenanten meines vetern Insigel Vlreichs des Tanner und mit hern Dietreichs Insigel des Gueffings, die der sach gezewg sind mit irn Insigeln, in an schaden. Der prief ist geben ze Wienn nach Christi Gepurd drewczehen hundert Jar darnach in dem ain vnd Sybenczigistem Jar, an sand Anthonii Tag.

Source Fulltext: HAUSWIRTH, Schotten (=FRA II/18, 1859) S. 337-338