Nos Leupoldus, dei gratia dux Austrie, Styrie, Karinthie et Carniole, dominus marchie Sclauonice ac Portusnaonis, comes in Habsburg, Tyrolis, Ferretarum et in Kyburg, marchio Burgowie ac lantgrafius Alsatie, ad vniuersornm notitiam deducimus per presentes, quod honorabilis et religiosus vir . . abbas monasterii sancte Marie Scotorum in Wienna ad nostram veniens presentiam nobis pro se atque conueutu suo magna precum instantia deuotissime supplicauit, quatenus quoddam priuilegium, a quondam domino et patruo nostro domino Friderico Romanorum rege inclite recordationis tunc duce existente eidem monasterio suo traditum et postea a domino et genitore nostro carissimo duce Alberto et fratre nostro dilecto duce Rudolfo recolende memorie innouatum, sibi atque dicto suo monasterio etiam innouare, approbare et confirmare de nostra beniuolentia dignaremur. Cuius quidem priuilegii tenorem cum confirmationibus inserendum presentibus duximus in hiis verbis. (Folgt die p. 309, Nr. CCLXXII abgedruckte Urkunde Herzogs Rudolf IV. ddo. 8. Juli 1360.) Nos itaque dux Leupoldus, decernentes supplicationem dicti abbatis admodum rationabilem atque iustam, dictum monasterium, quemadmodum nostri antecessores amplexantes vlnis gratie et benificentie specialis, in nostram tuitionem et protectionem recipimus singularem cum personis et rebus omnibus attinentibus monasterio supra dicto, priuilegium quoque, prout superius est annotatum, cum confirmationibus nominatis et vniuersos ac singulos suos articulos, omnes insuper donationes, indulgentias, gratias et libertates et Jura quelibet, dicto monasterio a prefatis domino Friderico rege Romanorum et genitore nostro dilecto vel ab aliis antecessoribus nostris liberaliter tradita et concessa, de benignitate solita innouamus. approbamus et presentis scripti patrocinio confirmamus, ac si predicta omnia de verbo ad verbum presentibus inseri contigisset. Nulli ergo omnino hominum liceat, hanc nostre protectionis (et) innouationis paginam infringre aut ei ausu temerario aliquo contraire. Quod qui secus attemptare presumpserit, indignationem nostram grauissimam et ad hoc penas premissas se nouerit vtique incurrisse. In cuius rei testimonium et perpetui roboris firmamentum presentes fieri et nostri sigilli appensione iussimus communiri. Datum Wienne in jeiunio die sabbato proximo ante dominicam, qua cantatur “Judica me Deus“ etc., anno domini millesimo trecentesimo septuagesimo tertio.

Source Fulltext: HAUSWIRTH, Schotten (=FRA II/18, 1859) S. 350-351