Ich Ottel Pillung von Ringendorf vnd all mein Eriben wier vergehen offenleich an dem brief vnd tuen chunt allen den, die den prief sehent oder horent lesen, die nu lebent vnd hernach chu^emftig sint, daz wir mit wolverdachtem mu^et vnd gu^enst vnd nach rat vnser pesten vreunt zu der zeit, do wir iz mit recht wol getun machten, Recht vnd redleich verchauft vnd geben haben meinen Hoff halben dacz Ringendorf vnd als, daz darzue gehort, vnd als, daz ich dacz Ringendorf gehabt han, zu ueld vnd zu dorf, gestift vnd vngestift, versu^echt vnd vnuersu^echt, yz sey holcz, acher, weingarten, phenninggelt, wie daz genant ist, vnd daz wir als zu lehen gehabt haben von vnserem genedigen herren hern Chadolten dem eltern von Ekhartzaw. Vnd die vorgeschriben güter han ich zu chauffen geben mit allen den eren, rechten vnd nuczen, vnd ich yz inhangehabt vnd herpracht, dem erbern vesten Ritter herren Offen dem Floyt, dieselben zeit Purkraf zu Ratcz, vnd allen seynen Eriben vmb zway vnd dreyzzig phunt wienner phenning, der ich gancz vnd gar gericht vnd gewert pin zu rechten tagen an als verthichen. Vnd han auch ich egenanter Ottel Pillung vnd all mein eriben dem erbern egenanten vesten Ritter hern Otten dem Floyt vnd allen seinen eriben die vorgeschriben gu^eter aufgeben an der stat, do wir es zu recht tun solten, also weschaydenleich, daz sew furwaz allen yren frum damit schaffen, versetzen, verchauffen, geben, wem sew wellen, an allew irrung. Vnd pin auch ich egenanter Ottel Pillung vnd all mein eriben dez erbern egenanten vesten Ritter hern Offen dez Floyt vnd aller seiner eriben der vorgeschriben gu^eter ir recht scherm vnd gewer für al ansprach, als chau^efs recht ist vnd dez Landez recht zu Osterreich. Wer aber, daz sew ansprach oder chrieg daran gewunnen mit dem rechten, von wem daz wer, daz schol ich in richtig machen, teit ich dez aber nicht, waz sew dez schaden nemen mit dem rechten, daz schol ich in abtragen vnd widercheren, vnd dieselben schaden schullen sew haben auf mir egenanten Ottlein Pillung vnd auf allen meinen eriben vnd auf aller der hab, dew wir haben in dem Lant zu Osterreich oder wo wir sew haben oder lazzen, yz sey varund hab oder erib, wir sein Lemtig oder tod. Vnd daz der chauf fürwaz stat vnd vnczebrochen beleib, so gib ich egenanter Ottel Pillung vnd all mein eriben dem erbern egenanten vesten ritter hern Otten dem Floyt vnd allen seinen eriben den brief versigelt mit meinem anhangundem insigel. Vnd durch pesser sicherhait willen so ist getzewg Pilczel Pillung, dieselben czeit purkraf zu Tyerna, vnd Gorg der Widersperger mit yeren anhangunden Insigeln, in an schaden. Der prief ist geben nach Christi gepu^erd drewczehen hundert Jar darnach in dem drin vnd sibenczigisten Jar, vierczehen tag nach sand Phylips tag.

Source Fulltext: HAUSWIRTH, Schotten (=FRA II/18, 1859) S. 351-352