Ich Jacob mit der Moerinn Vergich für mich und für all mein Erben vnd tun kunt allen den, die den brief lesent oder hörent lesen, die nu lebent vnd hernach chunftig sint, Daz ich mit aller meiner Erben gutem willen und gunst, mit wolbedachtem mut, zu der zeit, do ich es wol getün mocht, vnd mit meins Lehenherren hant des erwirdigen herren Maister Perichtolts von Wêhingen, Probst der Tumchirichen datz sant Stephan ze Wienn, verchaufft han meins rechten Lehens, daz ich von im vnd von demselben Gotshaus ze Lehen gehabt han, gantzen zehent auf syben hofsteten vnd auf zwaintzig Jeucharten akchers vnd auf fümfzehen weingarten, gelegen ze Strobleinstorf vnder dem Püsenperg, vnd swaz zu demselben zehent gehöret, es sei gestifft oder vngestifft, versücht oder vnuersücht, mit allen den nutzen vnd rechten, als ich in in Lehens gewer herpracht habe, also han ich denselben zehent recht vnd redleich verchaufft vnd geben vmb newn vnd zwaintzig phunt wienner phenning, der ich gantz vnd gar gewert pin, dem erbern mann Chunraten dem Chnolln, des hochgeporen fürsten Hertzog Albrechts ze Osterreich Speismaister, vnd seinen Erben, fuerbaz ledichleich vnd vreileich ze haben, vnd allen irn frumen damit ze schaffen, verchauffen, versetzen vnd geben, wem si wellen, an allen irrsal. Vnd sein auch ich vnd all mein Erben des vorgenanten zehents ir recht gewern vnd scherm für alle ansprach, als Lehens recht ist vnd des Lanndes recht ze Österreich. Wêr aber, daz in an demselben zehent icht chrieges oder ansprach auferstünd, von wem daz wer, mit recht, swaz si des schaden nement, das sullen wir in alles ausrichten vnd widercheren an allen irn Schaden, vnd süllen si daz haben auf vns vnd auf allem vnserm gut, daz wir haben in dem Lannde ze Osterreich oder wo wir es haben, wir sein lebentig oder tod. Vnd daz der Chauf furbaz also stêt vnd vnzebrochen beleib, darüber so gib ich obgenanter Jacob mit der Moerinn für mich vnd für all mein Erben dem vorgenanten Chunraten dem Chnolln vnd seinen erben den brief ze einem warn vrkünd der sach versigilten mit meinem insigil vnd mit der erbêrn Lawt irisigün, Pawln des Pawrbergêr vnd Stephans von Frowndorf, die ich des vleizzichleich gepeten han, daz si der sach gezewgen sint mit irn insigiln. Der brief ist geben nach Christes gepurt drewtzehenhundert iar darnach in dem newn vnd sybentzgistem iar, an sant Larentzen Tag.

Source Fulltext: HAUSWIRTH, Schotten (=FRA II/18, 1859) S. 379-380