Albertus, dei et apostolice sedis gracia episcopus Patauiensis, ad noticiam presencium et memoriam futurorum. Exhibita nobis venerabilium et religiosorum virorum in Christo nobis dilectorum Donati abbatis Scotorum Wienne et Leutoldi Sancti Ypoliti monasteriorum (sic) prepositi ipsorumque conuentuum nostre diocesis supplex peticio continebat, quod, cum ipsi ob suas et eorundem monasteriorum suorum euidentem vtilitatem et defensionem ampliorem partem fructuum quarundam decimarum suarum consistencium in Pulka dicte nostre diocesis nobilibus et spectabilibus viris dominis Burkhardo et Johanni burggrafiis de Maidburch et comitibus de Hardekk ipsorumque heredibus matura deliberacione prehabita concesserint, nos eidem concessioni annuere ipsique consensum nostrum prebere fauorabiliter dignaremur. Verum cum summa sit racio, que facit pro religione, nos dicte concessioni ac omnibus et singulis circa eandem ordinatis et dispositis, contentis in litteris desuper editis et confectis, prout iuste et prouide ac pro dictorum monasteriorum vtilitate facta sunt et habita, annuimus, prebentes ad ea consensum nostrum actoritate et officio ordinarie potestatis. In cuius rei testimonium et certitudinem pleniorem presentes litteras fieri et sigilli nostri appensione fecimus communiri. Datum ibidem Wienne die IlII^a. mensis Aprilis, anno domini millesimo trecentesimo octuagesimo.

Source Fulltext: HAUSWIRTH, Schotten (=FRA II/18, 1859) S. 382