Ich Niclas der Wuerffel vnd ich Margret sein hausfrow vnd all vnser Erben Wir vergehen vnd tuen kunt allen den, die den brief lesent oder hoerent lesen, die nv lebent vnd hernach chu^enftig sint, Daz wir mit gu^etem willen, mit verdachtem mu^et vnd mit gesampter hant, zu der zeit, do wir es wol getün mochten, verchaufft haben vnsers rechten aygens ein halb phunt wienner phenning geltes, daz man alle iar dient an sant Jörigen tag von der wayd ze Prunn, gelegen in Gerestorffer Pharr, mit allen den nu^etzen vnd rechten, als wir dasselb halb phunt geltes in aygens gewer herpracht haben, also haben wir es recht vnd redleich verchaufft vnd geben vmb sechs phunt wienner phenning, der wir gantz vnd gar gewert sein, dem erbern mann Chunraten dem Chnolln, zu den zeiten des hochgeporn fu^ersten Hertzog Albrechts ze Osterreich Speysmaister, vnd frown Dorothen seiner haiisfrown vnd ir payder erben, fürbaz ledichleich vnd freyleich ze haben vnd allen im frumen damit ze schaffen, verchauffen, versetzen vnd geben, wem si wellen, an allen irrsal. Vnd sein auch wir vnd all vnser Erben vnuersehaidenleich des vorgenanten halben phunt geltes ir recht gewern vnd scherm für alle ansprach, als aygens recht ist vnd des Lanndes recht ze Österreich. Wêr aber, daz in icht chrieges oder ansprach daran auferstünd, von wem das wêr, mit recht, swaz si des schaden nement, daz süllen wir in alles ausrichten vnd widerchern an allen irn schaden, vnd sullen si das haben auf vns vnuerschaidenleich vnd auf allem vnserm gu^et, daz wir haben in dem Lande ze O^esterreich. Vnd daz der Chauf fu^erbaz also stet vnd vnzebrochen beleib, darumb so geben wir in den brief ze einem warn vrku^end der sach versigilten mit mein obgenanter Niclas insigil des Wu^erffels vnd mit meins Pru^eder Insigil Hainreichs des Wu^erfels, die zeit des Rates der Stat ze Wienn, der der sach gezeug ist mit seinem insigil. Der brief ist geben ze Wienn nach Christes gepu^ert drewzehenhundert iar darnach in dem achtzgistem Jar, an sant Petronelln tag.

Source Fulltext: HAUSWIRTH, Schotten (=FRA II/18, 1859) S. 382-383