Ich Chunrat von Meyssow, obrister Marschalch in Österreich, vnd ich Vlreich von Meissow sein Sun, vnd alle vnser Erben Wier vergehen offenleich mit dem brief, das wir vnuerschaidenleich gelten sullen dem erbern Chnechtt Niclasen dem Pawch für seinen Herren hern Wernharten von Meyssow, mein obgenanten Chunrats pruder, dem Got gnad, acht vnd sibentzig phunt wienner pheiming, die er von des egenanten seines herren meins pruder wegen verlaist hat, vnd sullen ouch wir denselben Niclasen den Pawch vnd sein Erben der vorgenanten phenning vnuertzogenleich richten vnd wern an sand Jorigen tag, der schierist chumt, vnd durch mererr sicherhayt haben wir in dafür ze phannd gesatzt in dem rechten, als hernach geschriben stet, mit gutem willen, mit wolbedachtem mut, zu der zeit, do wir es wol getun mochten, vnd mit des Gruntherren hant des erwirdigen geistleichen Herren hern Donalts, Abt des Gotshawses vnser frown datz den Schotten ze Wienn, ein haws, das des vorgenanten hern Wernharts meins pruder gewesen ist, gelegen ouf der Renngazzen ze Wienn, vnd swas dartzu gehöret, da man alle Jar von dint den geistleichen herren datz den Schotten sechs Schilling vnd zwelif phenninge wienner munzze ze Gruntrecht und nicht mer, also mit ausgenomen Worten, ist, das wir den vorgenanten Niclasen den Pauch vnd sein Erben der vorgenanten acht vnd sibentzig phunt nicht richten vnd wern zu dem tag, so vorgenant ist, so sol das vorgenant haws für dieselben phenning ir rechts Choufgut sein, furbas ledichleich vnd freyleich (ze) haben vnd allen irn frumen damit schaffen, verchouffen, versetzen, schaffen, machen und geben, wem si wellen, vnd alles das damit tün vnd wandeln, das in allerpeste fugt oder wol geuellet, an allen chrieg vndirrsal. Wir sein ouch des vorgenanten phants ir recht gewern vnd scherm für alle ansprach, als Purkchrechts recht ist vnd der Stat recht ze Wienn in dem rechten, so vorgeschriben stet. Wer awer, das in mit recht daran icht abging, swas si des denne furbas schaden nement, das sullen si haben ouf vns vnuerschaidenleich vnd ouf allem vnserm gu^et, das wir haben in dem lannde ze O^esterreich, wir sein lebentig oder tod. Vnd daruber so geben wir in den brief zu einem warn vrchunt der sach versigilten mit mein obgenanten Chunrats insigil von Meyssow vnd mit des vorgenanten Gruntherren Insigil hern Donalts, abt datz den Schotten, vnd mit hern Vlreichs Insigil von Selltaw, die wir des vleizzichleich gepeten haben, das si der sach getzewgen sint mit irn Insigiln. Vnd wand ich obgenanter Vlreich von Meyssow selber noch nicht aygens insigils han, so verpind ich mich mit meinen trewn an geuêr vnder den vorgenanten insigiln, alles das stet ze haben vnd ze laisten, das vor an dem brief geschriben stêt, der geben ist ze Wienn nach Christes gepurt Drewtzehenhundert Jar darnach in dem ayns vnd achtzgistem Jar, des nechsten Montags nach sand Michelstag.

Source Fulltext: HAUSWIRTH, Schotten (=FRA II/18, 1859) S. 387-388