Ich Wolfhart, Reichers Svn des Wachsgiezzer, dem Got gnad, vnd ich Diemut sein hausfrow vnd all vnser Erben Wir vergehen vnd tun kunt allen den, di den brief lesent oder horent lesen, Daz wir mit gutem willen, mit wolbedachtem mut und mit gesambter hant, zu der zeit, do wir es wol getun mochten, vnd mit vnsers Gruntherren hant des erbern geystleichen herren hern Donalden, Abt des Gotshawses datz den Schotten ze Wienn, verchaufft haben vnser Haws, gelegen in der Wyltwericher strazz ze Wienn zenêchst Stephans Haws des Wyldenberger des Sneyder, dauon man alle iar dient den geystleichen herren datz den Schotten zwelif wienner phenning ze gruntrecht und nich mer. Das vorgenant Haws haben wir recht und redleich verchaufft vnd geben mit allen den nu^etzen vnd rechten, als wir es vnuersprochenleich in Gruntrechts gewer herpracht haben, vnd als es mit alter hercho^emen ist, umb Sechtzig phunt wienner phenning, der wir gantz vnd gar gewert sein, dem erbern mann Nyclasen von Rawen, purger ze Wienn, und frow Margreten seiner hausfrown vnd ir payder Erben, furbaz ledichleich vnd freyleich ze haben vnd allen irn frumen damit ze schaffen, verchauffen, versetzen vnd geben, wem si wellen, an allen irrsal. Vnd sein auch wir, ich egenanter Wolfhart, Reichers Svn, vnd ich Dyemut sein hausvrow vnd alle vnser erben, des vorgenanten Hauses des egenanten Nyclas von Raw¨n vnd frown Margreten seiner Hausfrown vnd ir payder Erben recht gewern vnd scherm für alle ansprach, als Gruntrechts recht ist und der Stat recht ze Wienn. Wêr aber, daz in an demselben Haws icht chrieges oder ansprach auferstund, von wem das wêr, mit recht, swaz si des schaden nement, das sullen wir in alles ausrichten vnd wyderchern an allen irn schaden. Vnd sullen si das haben auf vns vnuerschaidenleich vnd auf allem vnsern Gut, daz wir haben in dem Lande ze O^esterreich oder wo wir es haben, wir sein lebentig oder tod. Vnd daz der Chauf furbaz also stêt vnd vnzebrochen beleib, vnd wand wir selber aygen insigil nicht haben, darumb so geben wir dem vorgenanten Nyclasen von Raw¨n, frown Margreten seiner hausfrown und ir payder Erben den brief zu einem warn urkund der sach versigilten mit des vorgenannten Gruntherren insigil des erbern geystleichen herren hern Donalden, Abt datz den Schotten, vnd mit des erbern manns Insigil hern Fridreichs des Dyetrams, Purger ze Wienn, den wir des fleizzichleich gepeten haben, daz er der Sach gezewg ist mit seinem Insigil. Vnd verbinden auch vns vnder den vorgenanten insigiln mit vnsern trewn an geuer, alles das stet ze haben vnd ze laisten, daz vor an dem brief geschriben stet, der geben ist ze Wienn nach Kristi gepurt drewzehenhundert Jahr darnach in dem ayns und achtzgistem Jar, des nêchsten Sambstages nach sant Vlreichstag.

Source Fulltext: HAUSWIRTH, Schotten (=FRA II/18, 1859) S. 385-387