Wir Johanns, von gotes genaden Bischof ze Pazzaw, bechennen vnd tun kunt, Das der erber Vlreich der Helphannt mit vnserr hannt, gunst vnd willen Katrein seiner hawsfrawn, Hannsen von Schoennuelt tochter, zu rechter morigengab nach Lanndes recht ze Osterreich anderthalbhundert pfunt wienner pfenning auf der halben vestt ze dem Heiligenperig, als si mit graben vmbuangen ist, vnd mit aller ir zugeho^erung, die egenannt halb vestt, vnd was darzu gehort, von vns vnd vnserm Gotzhaws ze Passaw Lehen ist, redleich gemacht hat, vnd nach seiner vleizzigen pêt bestaten wir dasselb gemacht der egenanten morigengab, als morigengab vnd des Lanndes recht ist ze Ostereich, mit vrkunde des briefs besigelten mit vnserm angehangen insigel. Geben ze Passaw am nachsten Eritag nach sand Peters vnd sand Pauls tag, nach Kristi gepürde drewtzehenhundert iar vnd in dem drew vnd achtzigisten iare.

Source Fulltext: HAUSWIRTH, Schotten (=FRA II/18, 1859) S. 391-392