Ich Hainricus von Altdorf, die zeit pfarrer dacz Marcharstorf, das gelegen ist zwischen Recz vnd Pulka, Bekenn vnd tun kunt offenlich mit dem brief allen den, die den brief sehent oder horent lesen, die nu lebent vnd hernach chunftig sind, fur mich vnd fur all mein nachkomen pfarrer daselbens vnd czu der zeit, do ich es wol getun mocht, mit gunst des erwirdigen geistlichen herren abt Donalds vnserr frawn dacz den Schotten ze Wienn vnd des Conuents daselbens gemainlich, die der vorgenanten meiner Kirichen recht Lehenherren sind, wann die erbern leut, die gancz gemain dacz Marcharstorf, zu der obgenanten meiner chirichen ledichlich gegeben habent die guter alle, die hernach geschriben sind, von erst ainen halben weingarten, gelegen czu Marcharstorf in dem Altenperg, genannt der Mulhofer, dauon man alle Jar in dem lesen dient dem erbern vestten Ritter hern Jorigen dem Drukchseczen funfczehen wienner pfenninge, vnd in demselben Altenperg ain virtail weingarten, genant die Enten, dauon man auch dem egenanten hern Jörgen dem Druchseczen in dem lesen dient achtedhalben pfenninge wienner Muncz, vnd hinder den hewsern in den Seczen ainen weingarten mit ainen pawmgarten dabey, gelegen zenechst Niklein dem Peczlein an ainer Rain vnd zenegst Henslein dem Schimel an dem andern Rain, vnd derselb weingarten vnd pawmgarten weilnt ist gewesen Stepfans des Svmmers daselbens czu Marcharstorff, dauon man auch alle iar in dem lesen dint dem obgenanten hern Jorgen dem Drukchseczen dreyzzig wienner phenninge vnd nicht mer, vnd zwo gewanten akkers, gelegen in den Rewtten daselbens czu Marchartstorf zenechst Niklein dem Svmmer vnd zenegst der Terasserinn an dem andern Rain, der aine czu purchrecht ist vom pfarrer czu Pulka, dauon man demselben pfarrer dint alle Jar an sand Michelstag acht wienner pfenninge vnd nicht mer, die ander gwanten ist von dem pfarrer von Weiderfeld vnd dint demselben pfarrer all Jar an sand Michelstag fumf wienner pfenninge vnd nicht mer, darczw Sechczig pfunt wienner phenninge, die deselb gemain der vorgenanten meiner pharrchirichen cze Marcharczstorf gegeben habent, der ich vorgenanter her Hainricus, pfarrer ze Marchartstorff, vnd alle mein Nachkomen daselbens gancz vnd gar verricht vnd gewert sein. Vnd habent auch dieselb gemain ze Marchartstorf vmb dy vorgenanten Sechczig pfunt wienner phenninge guter gekouft ze Marchartstorff wie diselben guter genant sind, als diechouffbrieff sagent, die sy vns über diselben guter gegeben habent. Die vorgenanten gult vnd gueter mit alle die, vnd darczu gehort, es sey gestift vnd vngestift, versucht vnd vnuersucht, mit allen den eren, nuczen vnd rechten habent die obgenanten, die gancz gemain dacz Marchartstorff der obgenanten meiner pfarrchirichen ledichlich gegeben, vnd habent sich der genczlich geauzzert mit dem brieff vnd mit Gunst des erbern vestten Ritters hern Jorgen des Drukchseczen vnd seiner erben, der der obgenanten guter vogt vnd rechter gruntherre ist, also das si pey der egenanten meiner pfarrchirichen ze Marchartstorf ewichleich beleiben sullen vnd czuegehorn. Darumb so verpind ich mich vorgenanter her Hainreich, pfarrer ze Marchartstorff, fur mich vnd fur all mein nachkomen pfarrer daselbens, teglich ze haben ain priester zusampt vns, das wir alle tag teglichen vnd ewichlichen ain mess sullen ausrichten vnd verwesen in der obgenanten meiner pfarrchirichen czu Marichartstorff. Darczu sullen wir auch all Sambstag abend ain vesper singen, all Svnntag zwo mess auzrichten in der obgenanten meiner chirichen zu Marchartstorf, der aine sol gesprochen werden vnd die ander gesungen, vnd alle Hochczeit ze weinachten, ze Ostern vnd ze pfingsten, czu allen vnsern frawn tegen vnd an allen zwelifpoten tegen auch zwo mess, der gepunden sulln sein czu verwesen vnd ausczurichten an alle sawmung. Vnd alle hochczeit, zu allen vnser frawn tegen, zu allen zwelifpoten tegen, so vorgeschriben ist, des abends vnd des andern nachcz ain vesper, der wir auch sullen gepunden sein ze singen. Wer aber, das wir der mess aine versaumiten an ainen Svntag vnd die nicht gesprochen wurde an erhaft not, so sullen wir, ich obgenanter her Hainreich pfarrer vnd all mein nachkomen zu Marchartstorff, ainez virdungs wachsz verfallen sein, ze geben dem czechmaister zw dem liecht in der egenanten meiner pfarrkirichen, als oft die sawmung geschicht, als vorgeschriben stet. Vnd ob daz wer, das der mess aine an ainem Suntag versaumpt vnd nicht gesprochen würde, vnd das das an geuer geschech, so sullen wir des wachsz vnentgolten sein zv geben. Wer aber, daz wir des wachsz nach der saumung ainer mess wider wolten sein czu gehen vnd daz nicht czu dem liecht in der obgenanten sand Niclas chirichen ze Marchartstorff geben, als oft daz verschuldet wurde, so sulln vns die obgenanten, die gancz gemain oder wer des dorffs zu Marchartstorff gewaltig ist vnd vogt, engen an allen den gütern, die sy zu der ohgenanten vnser pharrchirichen gegeben haben, als sy vorbenant vnd geschriben sind, als lang, vncz daz wir nach einer ygleichen sawmung daz wachsz zw dem lyecht an der obgenanten meiner pfarrkirichen zu Marchartsdorff gegeben vnd volfurt haben an alle widerred. Das ist vnser gutlicher wille. Vnd daruber so gib ich vorgenanter her Hainreich, pfarrer czu Marchartstorff, den brieff besigilten mit des erwirdigen vorgenanten geistlichen herren Abt Donalds vnd des Conuents dacz den Schotten ze Wienn, der paider, grozzen anhangunden Insigiln. Vnd wenn ich vorgenanter her Hainreich von Altdorff, die czeit pfarrer czw Marcharlstorff, aigens Insigils nicht han gehabt, so verpind ich mich fur mich vnd fur all mein Nachkomen, pfarrer daselbens zw Marchartstorff, vnder des obgenanten meins gnedigen geistlichen herren Abts Donalds vnd des Confents paider Insigiln, alles das stet zu haben vnd czu folfuren, das hie vor an dem brieff geschriben vnd benant ist, vnd mit des obgenanten erbern vesten Ritters hern Jorigen des Drukchseczen, der der obgenanten guter aller rechter vogt vnd gruntherr ist, anhangundem Insigil. Der brieff ist geben an sand Niklas tag, do man zalt nach Kristy Gepurde drewczehenhundert Jar darnach in dem dritten vnd achczigistem Jare.

Source Fulltext: HAUSWIRTH, Schotten (=FRA II/18, 1859) S. 392-394