Ich Hensel der Weidner vnd ich Elspeth sein hawsfraw, vnd ich Härtel der Weidner vnd ich Chunigund sein hausfraw, vnd all vnser erben wir veriehen vnd tun chunt offenleich mit dem prief allen lewten, gegenwürtigen vnd chünftigen, Daz Pernhart der Weidner vnser veter vnd sein erben mitsampt vns durch rechter freuntschafft vnd fuedrung willen selbschol vnd purgel ist hintz Tröstlein dem Juden ze Hainburch vnd hintz sein Erben vmb sechtzg vnd sechtzehen phunt pfenning wienner münzz, die wir richten sullen auf di pfingsten, di nv schirist choment, als der prief sagt, den die vorgenanten Juden von vns vnuerschaidenleich darvmb habent, dovon wir den vorgenanten vnsern vetern Pernhart den Weidner vnd sein erben pringen vnd ledigen sullen an all scheden vnd mu^e, wenn si hinder der vorgenanten geltschuld nit mer sten wellent. Tun wir dez nit, wenn si vns denn vodernt, so sull wir yn vnuertzogenleich ain erbern chnecht selb andern vnd mit zwain pherten senten gen Hainburch in ein erber gasthaws, wo si vns yn zaigent, vnd sullen di do inne ligen vnd laisten, als inligens vnd laistens recht ist in dem Lant ze O^esterreich, vnd sullen darauz nicht chomen, wir pringen vnd ledigen denn den vorgenanten Pernhart den Weidner vnd sein erben von der vorgenanten geltschuld an all scheden vnd mu^e. Wer aber, daz wir di laistung vertzugen vnd nit laisteten, als oben geschriben stet, waz si denn furbaz der egenanten geltschuld schaden nement, wie der schad genant ist, den ir ainer, der den prief zaigt, pey sein trewn gesprechen mag, den sull wir yn allen abtragen und widerchern gantz vnd gar an all iren schaden vnd mu^e, vnd sullen si daz haben auf vns vnuerschaidenleich vnd auf vnsem erben vnd auf allen unsern gutern, di wir haben in dem lant ze O^esterreich oder wo wirs haben oder furbaz gewunnen, ez sein erb oder varent gueter, wir sein lembtig oder tod. Vnd darvber zu einem offen vrchund vnd waren gezeugen der sach geb wir yn den prief besigelt mit vnsern anhangunden Insigeln. Der prief ist geben nach Christi gepurd drewtzehen hundert Jar vnd darnach in dem drey vnd achtzgisten Jar, am nechsten Erichtag nach sand Niclastag.

Source Fulltext: HAUSWIRTH, Schotten (=FRA II/18, 1859) S. 395