Ich Michel der Vinkch, di zeit des Rates der Stat ze Wienn, vnd ich Joerg von Nicolspurkch, Purger daselbs, Wir vergehen für vns vnd für alle vnser Erben vnd tun kunt offenlich mit dem brief, Das wir vns des mit vnsern trewn an aides stat vnd an alles geuer verlubt vnd verpunden haben, vnd verpünden auch vns wizzentleich mit dem brif gegen den Erwirdigen Geistleichen herren hern Donalden Abpt des Gotshawses vnser frawn datz den Schotten ze Wienn vnd gegen allen seinen Nachkomen vnd dem egenanten irm Gotshaws vmb das Haws, dez weilnt zway Hawser gewesen vnd nv in aynen vrid geuangen sind, gelegen in der Strawchgazzen ze Wienn zenechst hern Hertleins Haws des Losenstainer, daz Mertt der Hawsleitter, fraw Kathrei sein hawsfraw, mein egenanten Michels Swester, verchawfft habent anstat derselben Kathrein vnd irer dreyer Kynder Jannsen, Lienharten vnd Kathrein, die noch nicht vogtper vnd zu irn beschaiden Jaren nicht chomen sind, vmb Hundert phunt vnd Acht vnd dreizzig phunt wienner phenning Jacoben dem Günser dem Sneyder, frawn Annen seiner hawsfrawn vnd ir baider Erben, als der Chaufbrief sagt, den si daru^eber habent, der mit des vorgenanten Abpt Donalds vnd vnsern baiden anhangunden Insigeln besigelt ist, also mit auzgenomen warten, wer, das derselb Abpt Donald, sein Nachkomen oder das egenant ir Gotzhaws von desselben besigellns vnd bestettens wegen von der vorgenanten Kynder wegen, oder von swem das wêr, icht chriege oder ansprach gewunnen, oder swas in Irrung dauon auferstuend, swas si des schaden nement, das sullen wir in alles ausrichten vnd widerchern an allen irn schaden, vnd süllen auch si daz haben auf vns vnd vnsern Erben vnuerschaidenleich vnd auf allem vnserm Gut, daz wir haben in den Lannden ze Österreich oder wa wir es haben, es sei Erbgut oder varund gut, wie das genant ist, wir sein lebentig oder tode. Vnd darüber zu einem warn vrkunde geben wir fur vns vnd fur alle vnser Erben dem vorgenanten erwirdigen herren hern Donalden, seinen Nachkomen vnd dem egenanten irm Gotzhaws den brif versigelten mit vnsern baiden anhangunden Insigelln. Der brief ist geben ze Wienn nach Kristes gepurde Drewtzehenhundert Jar darnach in dem vyer vnd Achtzigistem Jar, des nachsten Sambtztags nach sand Blasii Tag.

Source Fulltext: HAUSWIRTH, Schotten (=FRA II/18, 1859) S. 396-397