Ich Janns der Prewer vnd ich Jacob der Flasch und all vnser Erben Wir vergehen offenlich mit dem brief vmb das Haws, gelegen vor Werdertor ze Wienn in der Trenkch zenechst Seidel Hiltleins haws, daz Grvnnt ist von dem Erwirdigem Geistleichen herren hern Donalten Abbt des Goczhawses vnser Vrown datz den Schotten, das die erber frow vrow Elspet, weilent Vlreichs housurow des Strutzeleins, dem got gnade, verchaufft hat an ir selbs vnd an ir zwair Chinder stat Stephans vnd Margreten, die zu iren beschaiden iaren noch nicht chomen vnd nicht vogtper sint, daz wir vns für diselben zwai chinder angenomen haben, vnd vns des gegen dem egenanten Gruntherren abt Donalten vnd gegen seinen Nachkomen verlubt vnd verpunden haben, also, ob das geschech, daz si von des besigelns wegen vber das vorgenant Haws von der egenanten chinder wegen icht Chriegs oder ansprach auferstünd, swas si des schaden nement, das wir in dafür gentzleichen sten vnd in das alles ausrichten sullen an allen irn schaden. Vnd sullen ouch si das haben auf vns vnuerschaidenlich vnd auf allem vnserm Güt, daz wir haben in dem Lannde ze Österreich oder wo wir es haben, wir sein lebentig oder tod. Vnd wann wir selber aigener insigil nicht haben, daruber so geben wir dem vorgenanten Erwirdigen herren abpt Donalten vnd seinen Nachkomen den prief ze einem warn vrkund der sach versigilten mit der zwair erbern mann insigiln Hansen des Ratgeben vnd Andres des Frowndorffer, paid purger ze Wienn, die wir des vleizzichleichen gepeten haben, das si der Sach getzeugen sind mit iren anhangunden insigeln, yn an schaden. Vnd verpinden ouch vns mit vnsern trewn an geuer vnder iren insigiln ouch alles das stet ze haben vnd ze laisten, daz vor an dem brief geschriben stet. Der prief ist geben ze Wienn nach Kristi gepurd drewtzehenhundert iar darnach in dem Vier vnd Achtzigistem iar, an sand Veytstag.

Source Fulltext: HAUSWIRTH, Schotten (=FRA II/18, 1859) S. 398