Ich Wolfhart, zden zeiten Chappellan vnser vrown Chappellen auf der Stetten ze Wïenn, Vergich vnd tun chunt allen den, die den brief lesent oder hörent lesen, di nu lebent vnd hernach chunftig sind, das ich mit gutem willen vnd gunst der egenanten meiner Chappellen Lehenherren dez Hochwirdigen fursten hern Johansen Bischof ze Pazzaw, zu der zeit, da ich es wol getun mocht, vnd mit meins Purchherren hant des erwirdigen herren hern Donaldes, Abtt datz den Schotten ze Wienn, verchoufft hab Sechtzehen Jeuchhart akchers, die da stozzent an Gumppendorf vnd sind weilnt Herworts seligen auf der Sêwln gewesen, dauon man alle iar dient den geistlichen herrn datz den Schotten Sechtzehen wienner phenning ze purchrecht vnd nicht mer. Dieselben Sechtzehen Jeuch Akchers han ich an der egennanten meiner Chappellen stat Recht vnd redleich verchoufft vnd geben mit allen den nutzen vnd rechten, als si vnuersprochenlich in purchrechts gewer herchomen sind, vmb achtzehen phunt wienner phenning, der ich gantz vnd gar gewert pin, vnd die ich wider ze nutz derselben meiner Chappellen anlegen sol, dem erbern man Andren den Schüestlein vor Schottentor ze Wienn vnd seinen erben, furbaz ledichlich vnd vreilich ze haben vnd allen im frumen damit ze schaffen, verchouffen, versetzen vnd geben, wem si wellen, an allen irrsal. Vnd pin auch ich obgenanter Wolfhart vnd alle mein nachkomen, die der vorgenannten Chappellen Chapplan werdent, derselben Akcher dez egenanten Andres dez Schuestleins vnd seiner erben recht gewern vnd scherm fur alle ansprach, als purchrechts recht ist vnd des Landes recht ze Osterreich. Wer aber, daz si furbaz mit recht icht chriegs oder ansprach daran gewunnen, von wem daz wer, waz si des schaden nement, daz sullen wir in alles auzrichten vnd widerchern an allen irn schaden, vnd sullen auch si daz haben auf vns vnd allem dem gut, daz zu der obgenanten Chappelln gehört. Vnd daz der Chauf furbaz also stet vnd vnzebrochen beleib, darüber gib ich in den brief versigilten mit meinem Insigil vnd mit dez obgenanten Erwirdigen herren hern Donaldes, Abbt datz den Schotten ze Wienn, Insigil, den ich gepeten han, daz er der sache damit gezeug ist. Geben ze Wienn an sand Katreintag, nach Christs gepurd dreuczehenhundert iar darnach in dem vier vnd achtzigistem Jar.

Source Fulltext: HAUSWIRTH, Schotten (=FRA II/18, 1859) S. 399-400