Ich Hans der Grewzler von Pulka wekenne offenleich mit dem brief für mich vnd für all di mein, Daz ich westanden han vmb di erbern geistleichen herren den Abt vnd den Conuent der Schotten ze Wyenn recht vnd redleich zu einem leibgedingen ir weingarten vnd ir akker, di sy selber pyzher gepawt haben in irn hof ze Pulka, als hernach geschriben stet. Zum ersten so schol ich in geben in denselbigen hof zu Pulka von den ekern iärleich fümf mutt getreid, zwen mutt waicz und drey mutt habern. Ich schol auch geben von den weingerten den dritten emmer vnd schol den wein prezzen in dem vorgenanten Hof, so man ein press darin gehaben mag, dyweyl aber nicht ein press darinn ist, so mag ich anderswo den wein pressen, also daz sy irn anwalt dapey haben. Vnd wenn ich di weyngarten lesen wil, so schol ich irm anwalt in dem hof drey tag vor ze wizzen tuen. Ich schol auch di weingerten vnd di eker in rechtem mitelm paw haben vnd halten, als leibgedings recht ist in dem Land ze Osterreich. Tet ich des nicht, waz denn dy egenanten der abt vnd der Conuent der Schotten ze Wyenn des schaden nemen, daz schullen sy haben auf mir vnd auf all meinen erben, als erber lewt erchennen mügen. Vnd si schullen mir den mist wideruaren lazzen, der da wirt in irm hof ze Pulka, daz ich di vorgeschriben weingarten vnd akker gepawn vnd getungen mag. Auch ze welcher zeit ich abgee mit dem Tod in dem Jar, so schollen den vorgenannten Schotten ir weingarten vnd ir aker wider ledig vnd frey sein an aller meiner erben widerred. Vnd aller vorgeschriben sach zu rechter vrchund vnd geczeugenuzz gib ich in den prief wesigelten mit der erbern peder anhangunden Insigeln Hansen des Frenchleins ze Pulka vnd Giligen des Rarwolf, di ich vleizziglich gepeten hab, daz sew der sach geczeugen sind mit irn anhangunden Insigeln, in peden an schaden. Wenn ich selb di zeit nicht aigen Insigel het, so verpint ich mich mitsampt meinen erben mit meinen trewn vnder der peder vorgenanten anhangunden Insigl mit dem brief, allez daz steˆt ze haben, daz do vor an den brief geschriben ist an allez geuer. Geben nach Christs gepurd drewczehenhundert Jar darnach in dem vier vnd achczkisten Jar, an sand Thomans abent des heyligen zwelfpoten.

Source Fulltext: HAUSWIRTH, Schotten (=FRA II/18, 1859) S. 400-401