Ich Chraft, zu der zeit Richter zu Gaunesdorf, vnd auch wir die gantz gemain daselbs ze Gawnesdorff wir vergehen offenleich vnd auch vnuerschaidenleich alle miteinander vnd tun chunt allen den, die den brief lesent, sehent oder hörent lesen, die nu lebent oder hernach chunftig sind, das vns der erber fürst Abbt Donald, zu der czeit datz den Schotten ze Wienn, vnd auch her Walther, zu den zeiten pharrer zu Gaunesdorf, mit veraintem müt vnd auch wolbedachtem müt vnd Rat die gnad vnd die güt habent getan vnd habent vns geben vnd auch erlaubt zu Gaunesdorff, das wir ein viechtrift zu vnserm viech haben ewichleichen sullen neben irn zwain praitten, die gehornt zu dem Gotshaus vnd zu der Widem ze Gaunesdorf vnd die gelegen sind in dem Chirichueld, vnd habent das getan mit der beschaidenhait, das wir die gantz gemain zu Gaunesdorf vnd ouch furbaz alle vnser nachkomen in vnd auch allen irn nachkommen, wer pharrer ze Gaunesdorf ist, dem schullen wir furbas die egenant zwo praitten die gantz gemain zu Gaunesdorf ewichleich pefriden vnd pewarn, vnd suln dasselb tun ewichleich vnd alle zeit. So schull wir em als guten fridleichen frid machen vnd die egenanten zwo praitten, das dem pharrer noch der wydem in denselben praitten chain schad von vns noch von vnserm viech nymmer mag geschehen, in noch allen irn nachkomen. Vnd wer aber, das in daruber ewichleich in den egehanten zwain praitten icht schaden geschech von vns oder vnserm viech, das der pharrer, wer zu Gaunesdorff dieselben zeit pharrer ist, pei seiner gewissen gesprechen mag, denselben schaden den sull wir im die gantz gemain zu Gaunesdorff allen abtragen vnd widerchern an allen sein schaden, das loben wir im die gantz gemain miteinander zu Gaunesdorff vnuerschaidenleich alles also stet zu haben vnd zu laisten mit vnsern trewen ewichleich, wir vnd all vnser nachkomen, vnd sew sullen auch dasselb haben ewichleich auf vns, der gantzen gemayn zu Gaunesdorf, vnd auch auf allen vnsern nachkomen. Vnd das dise Red vnd auch die sach furbaz alle also stet vnd untzeprochen peleib, vnd zu einem ewigen sichtigen vrchunt der warhait diser sach, so geben wir, die gantz gemayn zu Gaunesdorff, für vns vnd all vnser nachkomen der vorgenanten Wydem, vnd wer pharrer zu Gaunesdorf ist, den brief versigilten, wann wir nicht aigen Insigil haben, so haben wir vleyssichleich gepeten den erbern Ritter hern Hansen von Pelndorff vnd auch den erbern man Hannsen den Chublitzer von Negsendorff, das sew der sach vnd der Wandlung also an vnser stat zusambt vns ir zeug sind mit irn anhangunden Insigem, in an schaden. Der brief ist geben nach Christes gepurd drewtzehenhundert Jar vnd darnach in dem fumfvndachtzigisten Jar, des Suntag zu mittervasten.

Source Fulltext: HAUSWIRTH, Schotten (=FRA II/18, 1859) S. 401-402