Ich Hainreich der Chaltenganger vnd ich Kathrei sein hawsfraw vnd alle vnser Erben Wir vergehen offenleich mit dem brif, das wir vnuerschaidenleich gelten süllen dem erbern mann Hainreichen dem Techler, purger ze Wienn, vnd seinen Erben sechs vnd fünftzig phunt wienner phennig, der wir si, oder swer vns an irer stat mit dem brif mant, vnuertzogenleichen richten vnd wem süllen in den nachsten siben Jarn, die schirst nacheinander chöment, yedes Jares acht phunt wienner phennig an sand Michels Tag an alles vertzichen, vnd haben in dafür ze phant gesatzt mit vnser Erben gutem willen vnd gunst, mit verdachtem müte vnd mit gesamter hant, zu der zeit, da wir es wol getun mochten, vnd mit vnsers Gruntherren hant des erwirdigen geistleichen herren hern Donalds, Abbt des Gotzhawses vnser frawn datz den Schotten ze Wienn, vnser Mül, gelegen an dem Chaltengang oberthalb der Mül genant die Sleicherinne, vnd alles, das dartzue gehoret, ze veld vnd ze dorff, es sei gestiffit oder vngestifft, versücht oder vnuersücht, wie daz genant ist, mit allen den nützen vnd rechten, als die in gruntrechts gewer vnd mit alter herchömen ist, da man von derselben mül vnd irer zügehörung alle iar dint dem vorgenanten Gotzhaws datz den Schotten ze Wienn fünf Schilling wienner phennig ze Gruntrecht, also mit auzgenomen worten, zu welchem Tag, vnd vorbenant ist, wir in ir gelt, daz in denn ze geben geuellet, nicht richten vnd wern, so ist daz vnser gütleich wille vnd sullen auch si denn vollen gewalt vnd recht haben, mit der egenanten mül vnd swas darczue gehöret, irm phant, an fürbot vnd an chlag allen irn frumen ze schaffen mit verchawffen vnd mit versetzen, wem si wellen, an allen irrsale als uerr, das si des vorgenanten irs gelts, daz in denn ze geben geuellet zuyedem Tag, so vorbenant ist, vnd alles des schadens, den si sein denn fürbaz nement, wie der schad genant ist, den si, oder swer vns an irer stat mit dem brif mant, bey irn trewn vngeswarn gesprechen mügen, dauon gantz vnd gar verrichtet vnd gewert werden. Vnd swaz in Haubtgüts vnd schaden an demselben irm phant abget, daz süllen si haben auf vns vnuerschaidenleich vnd auf allem vnserm gut, daz wir haben in den Lannden ze Osterreich oder wa wir es haben, wir sein lebentig oder tode. Wir sein auch mitsamt vnsern Erben vnuerschaidenleich derselben Mül vnd swaz dartzue gehöret, irs phants, ir recht gewern vnd scherm für allew ansprach, als phants vnd gruntrechts recht ist vnd des Lanndes recht ze Österreich. Vnd wannd wir selber nicht aigens Insigels haben, darüber so geben wir in den brif zu einem warn vrchunde vnd getzewg der sach versigelten mit des Gruntherren Insigel des vorgenanten Abbt Donalds datz den Schotten ze Wienn vnd mit Jannsen Insigel des Chetner, den wir des gepeten haben, daz er der sach getzewg ist mit seinem anhangundem Insigel, darunder wir vns verpinden mit vnsern trewn an geuerde alles das stet ze haben, das vor an dem brif geschriben stet, der geben ist ze Wienn nach Kristes gepürde Drewczehenhvndert Jar darnach in dem Acht vnd Achtzigistem Jar, des Sambcztags in den ersten vir Tagen in der Vastten.

Source Fulltext: HAUSWIRTH, Schotten (=FRA II/18, 1859) S. 417-418