Ich Dietreich der Floit, hern Otten Sun des Floyt, dem Got gnad, vergich vnd tun kunt allen den, die den brief lesent oder hörent lesen, die nv lebent vnd hernach chümftig sint, daz ich mit aller meiner erben guetem willen vnd gunst, mit wolbedachtem muet vnd nach Rat meiner frewnt, zu der zeit, do ich es wol getu^en möcht, verchoufft han meins rechten lehens, daz ich von dem hochwirdigen Fürsten dem Bischof vnd dem Gotshaus ze Pazzow ze lehen gehabtt han, meinen viertail des ganczen dorffczehents ze Ruspach dacz sand Osuwalt, weinczehent vnd traidczehent, grozzen vnd chlainen, ze veld vnd ze dorff. Darnach han ich verchoufft meins rechten aigens mein zehentel, gelegen ze Nidern Ruspach auf dem Gerewtt auf Newn Jeuchen akchers, vnd alles daz, das zu den vorgenanten zehenten gehöret, vnd alles daz, das ich daselbs ze Ruspach gehabt han, es sein weinczehent, Traidczehent, traidgült, phenninggült, behausts güt, v¨berlennd, ze veld vnd ze dorf, es sei gestifft oder vngestifft, versuecht oder vnuersuecht, wie so das genant ist, nichts ausgenomen. Die vorgenanten zehent vnd alles daz, das darczue gehört, vnd alles daz, daz ich daselbs ze Ruspach dacz sand Oswalt gehabt han, wie das genant ist, als vorgeschriben stet, han ich recht vnd redleich verchoufft vnd geben mit allen den nüczen vnd rechten, als es mich von dem egenanten meinem vater seligen anerstarben vnd angeerbt ist, vnd als ich das lehen in lehens gewer, das aigen in aigens gwêr herpracht han, vnd als es mit alter herchömen ist, vmb hundert phunt vnd vmb vierczehen phunt wienner phenning, der ich gancz vnd gar verricht vnd gewert pin, meinem lieben prueder hern Niclasen dem Floyt von Stayneprunn vnd seinen erben, fürbas ledichlich vnd freileich ze haben vnd allen iren frumen damit ze schaffen, verchouffen, verseczen vnd geben, wem si wellen, an allen irrsal. Vnd pin auch ich obgenanter Dietreich der Floit vnd all mein erben vnuerschaidenleich der vorgenanten zehennt vnd alles dez, daz darczue gehöret, vnd alles dez, daz ich daselbs zu Ruspach dacz sand Oswalt gehabt han, des egenanten meins prueder hern Niclas des Floit vnd seiner erben recht gewern vnd scherm für alle ansprach, des leben, als lehens recht ist, des aigen, als aigens recht ist vnd des Lannds recht ze O^esterreich. Wêr aber, das in fürbaz an denselben zehenten vnd an aller irer zueghörung vnd an allem dem, das ich daselbs ze Ruspach gehabt han, mit recht icht abgieng, oder ob in mit recht icht chriegs oder ansprach daran auferstünd, von wem das wêr, swaz si des schaden nement, das sülln wir in alles ausrichten vnd widerchem an allen iren schaden, vnd süllen auch si daz haben auf vns vnd auf allem vnserm guet, das wir haben in dem Lannde ze Österreich oder wo wir es haben, wir sein lebentig oder tod. Vnd das der Chouf fürbas also stet vnd vnczebrochen beleib, darüber so gib ich obgenanter Dietreich der Floit für mich vnd für all mein erben in den brief zu einem waren vrchunt der sach versigilten mit meinem anhangundem Insigil vnd mit meiner vettern insigiln Jannsen des Floit von Poraw vnd Wernharts des Floit von Grossem Ruspach, die der sach geczeugen sint mit iren anhangunden insigiln, in an schaden. Der brief ist geben ze Wienn nach Christes gepurde Drewczehen Hundert Jar darnach in dem achtt vnd achczigistem Jar, dez negsten Sambstags vor sand Jorigentag.

Source Fulltext: HAUSWIRTH, Schotten (=FRA II/18, 1859) S. 419-420