Ich Wernhart der Floyt von Grozzem Rustpach vergich für mich vnd für all mein Erben vnd tun kunt allen den, die den brief lesent oder hörnt lesen, die nv lebent vnd hernach chünftig sind, das ich mit gütem willen, mit wolbedachtem müt vnd nach meiner nechsten frewnt Rat, zu der zeit, do ich es wol getun mocht, verchawfft han meines rechten aigens Newn Jewchart akchers, gelegen pey Hipplinger viechtrift pey der Lantstrazz, mit allen den nützzen und rechten, als ich dieselben Newn Jewchart akchers vnuersprochenleich in aigens gewer herpracht han vnd als si mit alter herchömen sind, also han ich si recht vnd redleich verchawfft vnd geben vmb acht phunt wienner phenning, der ich gantz vnd gar verrichtet vnd gewert pin, den erbern beschaiden Law¨ten der gantzen gemayn ze dem Hippleins vnd allen irn nachkommen, fürbas die egenanten Newn Jewchart akchers ledichleich vnd freyleich ze haben vnd allen irn frumen damit ze schaffen, verchawffen, versetzzen vnd geben, wem si wellen, vnd alles das damit tun vnd handeln, das in allerpest fugt oder wol geuellet, an allew irrung. Vnd pin auch ich obgenanter Wernhart der Floyt mitsampt allen meinen Erben vnuerschaidenleich derselben Newn Jewchart akchers ir recht gewern vnd scherm für allew ansprach, als aigens recht ist vnd des landes recht ze Österreich. Wer aber, das in daran icht abgieng mit recht, oder ob in an denselben Newn Jewcharten akchers icht chrieges oder ansprach auferstünd, von wem das wer, mit recht, swas si des schaden nement, das süllen wir in alles auzrichten vnd widerchern an allen irn schaden, vnd süllen si das haben auf vns vnuerschaidenleich vnd auf allem vnserm güt, das wir haben in dem land ze Österreich oder wo wir es haben, wir sein lebentig oder tod. Vnd das der chawf fürbas also steˆt vnd vnzebrochen beleib, darüber so gib ich obgenanter Wernhart der Floyt für mich vnd für alle mein Erben der vorgenanten gantzen gemayn ze dem Hippleins vnd allen irn nachkomen den brif zu einem warn vrchund der sach versigilten mit meinem insigil vnd mit meins Pruder insigil Engelharts des Floyts, vnd han fleizzichleich gepeten den erbern Hansen den Pewntner ze Obern Greitschesteten, das er sein insigil zu einer gezewgnüzz der sach im an schaden an den brif gehangen hat, der geben ist nach Cristi gepurd drewzehenhundert Jar darnach in dem acht vnd achtzigistem Jar, des nechsten Phintztags vor sand Mathewstag des heiligen zwelifpoten vnd Ewangelisten.

Source Fulltext: HAUSWIRTH, Schotten (=FRA II/18, 1859) S. 420-421