Ich Ulreich der Schelinger von Meylespach vergich offenlich vnd tün chund allen den, die den brief sehent oder hörent lesen, die nu lebent vnd hernach chunftig sind, das ich mit wolbedachtem müt, nach Rat meiner negsten frewnt, zu der zeit, do ich es mit recht wol getün möcht, recht vnd redlichen verchouft han meinen weingarten zu Recz in dem Perig genant in der Wiegen, des ein drittail vnd ein virtail weingarten ist, zu paiden Rainen zunegst dem Eysfogel gelegen, dauon man dint jerlich an sant Michelstag, wer Purigermaister ist zu Recz in der stat, von dem drittail zehen phenninge vnd am drittail weins vnd von dem virtail weingarten achtedhalben phenninge vnd ain virtail weins zu Perchrecht, der erbern frawn Warbaran, hern Niclas töchter vom Aycharns, des erbern vestten Ritters hern Niclas des Floyts wirtinn von Starein, vnd iren erben in der tewrung, als ich dieselben weingarten gechouft han, der ich obgenanter Vlreich der Schelinger vnd mein erben von der egenanten meiner frawn vnd von iren erben genczlich verricht vnd gewert sein zu rechten tegen an vnsern schaden. Si mogen auch mit denselben weingarten furpas allen iren frum schaffen, nuczen vnd messen, verchouffen vnd versetczen, geben, wem sy wellent, an alle irrung. Vnd pin auch ich obgenanter Vlreich der Schelinger vnd mein erben der egenanten meiner frawn Warbaran, hern Niclas des Floyts wirtinn von Starein, vnd irr erben der vorgenanten weingarten ir recht scherm vnd gewern für alle ansprach, als Purchrechts vnd des Lands in Osterreich Recht ist. Wer aber, das si chrieg oder ansprach daran gewunnen, von wem das wêr, mit dem rechten, denselben chrieg vnd was si des schaden nement, das sullen wir in genczlichen ausrichten vnd iren schaden widerchern, den sy sein nement mit dem rechten, als Purchrechts recht ist. Vnd ob in daran icht abging, das sullen si haben auf vns vnuerschaidenlich vnd auf allem vnserm gut, das wir haben in dem Lande zu Österreich oder wo wir es haben, wir sein lebentig oder tode. Vnd zu ainer waren sichtigen vrchund geben wir, ich obgenanter Vlreich der Schelinger von Meylespach, der egenanten meiner frawn Warbaran, des obgenanten vestten Ritters hern Niclas des Floyts wirtinn von Starein, vnd iren erben den brief für mich vnd fur mein erben besigilten mit meinem aygem anhangundem insigil. Der sache ist auch geczeug durich meiner pet willen der erber man Dyetreich der Drokkendorfer von Weyderfelt mit seinem anhangundem Insigil, im an schaden. Der brief ist geben, do man zalt nach Christi geburd dreuczehenhundert Jar vnd darnach in dem Neyn vnd achczigistem Jar, am negsten Montag nach sand Floryans Tage.

Source Fulltext: HAUSWIRTH, Schotten (=FRA II/18, 1859) S. 421-422