Ich Hanns der Smid von Nustorf vnd ich Christein sein Housvraw vnd all vnser erben Wir vergehen vnd tun chunt offenleich mit dem brief allen den, die in lesent oder hörent lesen, die nu lebent vnd hernach chümftig sint, daz wir mit guetem willen, mit verdachtem muet vnt mit gesambter hant, zu der zeit, do wir es wol getun mochten, vnd mit vnsers Gruntherren hant des Erwirdigen Geistleichen herren hern Donalts, Abpt des Gotshaws vnser frown dacz den Schotten ze Wienn, verchoufft haben vnser haws, gelegen vor Schottentor ze Wienn vnd haizzet der Weithof, vnd den weingarten hinden daran zenegst Hannsen haws des Grueber des Pinter, do man von dem egenanten vnserm haws, dem weingarten hinden daran vnd swas dorazue gehöret, daz wir miteinander mit gesambter hant eraribait vnd gekoufft haben, alle Jar dient den Geistleichen herren dacz den Schotten zwen vnd fumftzig wienner pfenning ze Gruntrecht vnd nicht mer, dasselb haws genant der Weithof vnd den weingarten doran vnd swas darczü gehöret, haben wir recht vnd redleich verchoufft vnd geben mit allen den nuczen vnd rechten, als wir es vnuersprochenleich in Gruntrechts gewer herpracht haben vnd als es mit alter herchomen ist, vmb fumfczig pfunt wienner pfenning, der wir gancz vnd gar verricht vnd gewert sein, dem erbern mann Seifriden dem Füchslein, purger ze Wienn, vnd seiner housfrown frown Eysaln vnd ir paider erben, fu^erbas ledichleich vnd freileich ze haben vnd allen iren frumen damit ze schaffen, verchouffen, verseczen vnd geben, wem si wellen, an allen irrsal. Vnd sein auch wir obgenante, ich Hanns der Smid vnd ich Christein sein housfrow, vnd all vnser erben vnuerschaidenleich des vorgenanten hawses, genant der Weithof, vnd des weingarten doran vnd swas dorczue gehöret, des egenanten Seifrids des Füchslein frown Eysaln seiner housfrown vnd ir baider erben recht gewern vnd scherm für alle ansprach, als Gruntrechts recht ist vnd der Stat recht ze Wienn. Wêr aber, das in fürbas an demselben Haws vnd dem weingarten daran vnd swas dorczue gehöret icht chriegs oder ansprach auferstund, von wem das wêr, mit recht, swas si des schaden nement, das sullen si haben auf vns vnuerschaidenleich vnd auf allem vnserm guet, das wir haben in dem Lannd ze Österreich oder wo wir es haben, wir sein lebentig oder tod. Vnd das der chouf fürbas also stet vnd vnczebrochen beleib, vnd wann wir selber aigens insigils nicht haben, daruber so geben wir in den brief zu einem waren vrchunt der Sach versigilten mit des vorgenanten Gruntherren Insigil hern Donalts, Abpt dacz den Schotten, vnd mit des erbern manns Insigil Niclas des Rarwolfs, purger ze Wienn, die wir des vleizzichleich gepeten haben, das si der sach geczeugen sint mit irn angehangen Insigiln, demselben Rarwolf an schaden, vnd verpinden auch vns mit vnsern trewn an geuer vnder den vorgenanten Insigiln, alles das stet ze haben vnd ze laisten, daz vor an dem brief geschriben stet, der geben ist nach krists gepürde tawsent drewhundert Jar darnach in dem acht vnd achtzigistem Jar des negsten phincztags nach dem Prehemtag.

Source Fulltext: HAUSWIRTH, Schotten (=FRA II/18, 1859) S. 415-416