Ich Vlreich von Missingdorf vergich vnd tun chund offenlich für mich vnd fur alle mein erben allen den, dy den brief sehen oder hören lesen, dy nu lebent vnd hernach kunftig sind, daz ich mit verdachtem mut, nach Rat, gunst vnd willen meiner erben, zu der zeit, do ich es wol getün mocht, fürczicht getan han vnd verczeich auch mich mit rechtem wissen des briefs gegen hern Niclasen dem Floyt von Storein, vnd gegen Jorgen vnd Otten paiden pruedern den Palterndorffern vnd gegen allen iren erben aller der gueter, gelegen dacz Heczmanstorff in Nidern Holabrunner pfarr, wie dieselben gueter genant oder wo sy daselbens cze Heczmanstorff gelegen sind, nichcz ausgenomen, in solcher mass vnd mit ausgenomen warten, das ich obgenanter Vlreich von Missingdorff vnd mein Erben hincz hern Niclasen dem Floyt, hincz Jorgen vnd Otten pruedern, den Palterndorffern vnd hincz allen iren erben von der obgenanten gueter wegen dacz Heczmanstorf, sy sein aigen oder wie so dieselben gueter genant sind, fürbas dhain ansprach, vodrung noch warttung dagegen nymmermer nicht haben noch gewinnen sullen noch wellen, vil noch wenig, in dhainem weg mit recht noch an recht, sunder sy mogen mit denselben guetern vnd mit aller irr zuegehorung allen iren frum schaffen, wie in das allerpest füget, also, daz wir si daran nindert hindern noch irren sullen noch wellen an alles geuerd. Vnd das die ohgenant verczeichung fürbaz also gehalden stet vnd alle obgenant pvnd vnd artikel vnczebrochen sullen beleiben, daruber gib ich vorgenanter Vlreich von Missingdorff fur mich, fur alle mein erben hern Niclasen dem Floyt, Jorgen vnd Otten pruedern den Palterndorffern vnd allen irn erben den brief zw ainer waren vrkund besigilten mit meinem anhangundem Insigil. Der sach sind auch geczeugen mein paid vettern der erber Ritter her Seybot von Missingdorff vnd Stepfan von Missingdorf zw Gokaczsch mit iren anhangunden Insigiln in an schaden. Geben an negsten Eritag vor sand Kolmans Tag, nach Christi gepürd drewtzehenhundert Jar vnd in dem Newnczigistem Jare.

Source Fulltext: HAUSWIRTH, Schotten (=FRA II/18, 1859) S. 423