Ich Hanns von Leyna vergich vnd tün kunt allen den, die den brief lesent oder hörnt lesen, die nv lebent vnd hernach chumftig sind, das ich mit aller meiner Erben gutem willen vnd gunst, mit wolbedachtem müt, zu der zeit, da ich es wol getun mocht, verchoufft han meines rechten Lehens, das ich von dem erbern herren hern Hannsen dem Mezzenpekchen ze lehen han gehabt, vnd der mir das von gnaden verliehen hat, vnd das nu ledig warden ist von Haidlein von Pestorff, dem got gnad, meinen hof gelegen daselben ze Pestorf vnd alles das, das dartzu gehöret, ze veld vnd ze dorf, es sey gestifft oder vngestifft, versucht oder vnuersucht, wie so das genant oder wo das gelegen ist, mit allen den nutzen vnd rechten, als wir in in lehens gewer herpracht haben vnd als er mit alter herkomen ist, vmb vier vnd zwaintzig phunt wienner phenning, der ich gantz vnd gar verricht vnd gewert pin, dem vorgenanten meinem herren hern Hannsen dem Messenpekchen vnd seinen Erben, furbas ledichleich vnd freyleich ze haben vnd allen iren frvmen damit ze schaffen, verchouffen, versetzen vnd geben, wem si wellen, an allen irsal. Ich pin auch mitsambt allen meinen Erben vnuerschaidenleich des vorgenanten hofs vnd alles des, das dartzü gehoret, als vorbenant ist, des egenanten meines herren hern Hannsen des Messenpekchen vnd seiner Erben recht gewern vnd scherm für alle ansprach, als Lehens recht ist vnd des Lanndes recht ze Osterreich. Wer aber, das in furbas an demselben hof vnd an aller seiner zugehorung, so vorbenant ist, mit recht icht abgieng, oder ob in mit recht icht chriegs oder ansprach daran auferstund, von wem das wer, swas si des schaden nement, das sullen wir in alles ausrichten vnd widerchern an allen irn schaden, vnd sullen auch si das haben auf vns vnd auf allem vnserm güt, das wir haben in dem Lannde ze Osterreich oder wo wir es haben, wir sein lebentig oder tod. Vnd das der kouf furbas also stet vnd vnczebrochen beleib, darumb so gib ich obgenanter Hanns von Leyna für mich vnd für all mein Erben in den brief zu einem warn vrchund der sach versigilten mit meinem angehangen insigil vnd mit des erbern manns insigil Petreins des Guntzpurger, purger ze Wienn, der der sach getzeug ist mit seinem anhangundem insigil, im an schaden. Der brief ist geben ze Wienn nach Kristi gebürt drewtzehenhundert Jar darnach in dem Newntzgistem Jar, an sant Elspeten tag.

Source Fulltext: HAUSWIRTH, Schotten (=FRA II/18, 1859) S. 424-425