Ich Vlreich der Waydhofer vnd ich Elzbet sein hausurow vnd alle vnser erben Wir vergechen vnd tun chunde allen den, die den brief lesent oder hornt lesen, die nv lebent vnd hernach chunftig sint, das wir mit gutem willen, mit verdachtem müt vnd mit gesambter handt, zu der zeit, da wir es wol getun mochten, vnd mit vnsers Gruntherren handt des erbern herren hern Petreins, zu den zeiten Chapplan der Chappellen in der Purch ze Wienn, verchoufft haben Newn Schilling wienner phenning gelts purchrechts auf vnserm haws, gelegen in dem Tewffen Graben ze Wienn zenechst des Platernascher haws, da man von dem egenanten vnserm haws alle iar dient der Chappellen in der Purch ze Wienn dreizzig wienner phenning, halb an sant Jörgen tag vnd halb an sand Michelstag, ze Gruntrecht vnd nicht mer. Die vorgenant Newn Schilling geltes purchrechts haben wir auf dem egenanten vnserm haws recht vnd redleich verchoufft vnd geben vmb Newn phunt wienner phenning, der wir gar verricht vnd gewert sein, den erbern Geistleichen herren dem gantzen Conuent datz den Schotten ze Wienn vnd irn Nachkomen, furhas ledichleich vnd freyleich ze haben vnd allen irm frvmen damit ze schaffen, verchouffen, versetzen vnd geben, wem si wellen, an allen irrsal, also mit ausgenomer red, das wir vnd alle die, die das vorgenant unser haws nach vns inne habent vnd besitzent, in die vorgenanten Naewn Schilling geltes furbas alle iar dauon dienen sullen zu drin zeiten im iar, an sand Jorgentag, an sand Michelstag vnd ze weichnachten, zu yedem tag drey Schilling wienner phenning, mit allen nutzen vnd rechten, als man an der purchrecht in der Stat ze Wienn dient. Vnd sullen auch mit dem ersten dienst anheben an sand Jorgentag, der schirist chumbt. Wir haben auch vollen gewalt vnd recht, dieselben Newn Schilling gelts wider abtzekouffen, wann wir das getün mugen oder wellen, miteinander mit Newn phunden wienner phenning vnd den nechsten dienst damit, der denn dauon ze dienen geuellet, an allen chrieg. Vnd wenn der dinst versezzen wirt, so ist denn auf das vorgenant vnser haws vmb zwispild ze vragen ze viertzehen tegen, als vmb versezzens purchrecht recht ist vnd der Stat recht ze Wienn. Wir sein auch mitsambt allen vnsern erben vnuerschaidenleich der vorgenant Newn Schilling geltes Purchrechts auf dem egenanten vnserm haws des egenanten Conuents datz den Schotten vnd irer Nachkomen recht gewern vnd scherm für alle ansprach, als Purchrechts recht ist vnd des Lanndes recht ze Österreich. Wer aber, das in derselben gült mit recht daran icht abgieng, das sullen si haben auf vns vnuerschaidenleich vnd auf allem vnserm gut, das wir haben in dem Lannde ze Osterreich oder wo wir es haben, wir sein lebentig oder tod. Vnd wannd wir selben aigen insigil nicht haben, daruber so geben wir in den brief zu ainem warn vrchund der sach versigilten mit des obgenanten Gruntherren insigil hern Petreins, Chapplans der Chappellen in der Purch ze Wienn, vnd mit des erbern manns insigil hern Lienharts des Vrbetschen, purger ze Wienn, vnd mit mein obgenanten Vlreichs Vater insigil Hainreichs des Waydhofer, die wir des fleizzichlich gepeten haben, das si der sach getzeugen sint mit irn anhangunden insigiln, demselben Vrbetschen an schaden, vnd verpinden ouch vns mit vnsern trewn an geuerd vnder den vorgenanten insigiln, alles das stet ze haben vnd ze laisten, das vor an dem brief geschriben stet, der geben ist ze Wienn nach Kristi gepurd drewtzehenhundert Jar darnach in dem ains vnd Newntzgistem Jar, des nechsten Montags vor sand Peterstag als er auf den Stul gesatzt ward.

Source Fulltext: HAUSWIRTH, Schotten (=FRA II/18, 1859) S. 425-426