Vniuersis et singulis presentes litteras inspecturis nos Leonardus dictus Schawr, licentiatus in decretis, Ratisbonensis et Patauiensis ecclesiarum canonicus, officialis curie Patauiensis, salutem in domino sempiternam, Cum discretus vir Eberhardus de Garss, rector parrochialis ecclesie sancte Affre in Ekkendorff Patauiensis diocesis, coram nobis in iudicio personaliter constitutus et ad instanciam venerabilis in Christo patris domini Donaldi, abbatis monasterii beate Marie uirginis Scotorum in Wyenna, ad nostrarn presenciam euocatus, non ad hoc inductus dolo, vi, metu aut suggestione alicuius persone, sed sua propria et spontanea voluntate judicialiter est confessus et eciam obligauit fide data loco prestiti juramenti, se et suos successores nomine dicte ecclesie in Ekkendorf antedicto monasterio Scotorum racione annui census tamquam debiti constituti ex incorporacione dicte ecclesie ad dictum monasterium et exsoluti per tantum tempus, de cuius memoria hominum non existit, singulis annis soluturos et soluere debere VIII libras denariorum Wyennensium per terminos infrascriptos, duas libras denariorum in quolibet festo natiuitatis Christi, tres libras denariorum in quolibet festo purificacionis beate uirginis et reliquas tres libras denariorum in quolibet et inmediate sequenti festo sancti Georgii cuiuslibet anni, non obstantibus decimis maioribus et minoribus, quas ab antiquo in dicta ecclesia in Ekkendorf singulis annis leuare et percipere consueuit monasterium antedictum. Quod si in dictis terminis eidem domino . . abbati uel ei, qui pro tempore fuerit abbas, aut antedicto monasterio predictus annuus census octo librarum per dictum Eberhardum uel suos successores traditus et exsolutus non fuerit, promisit idem Eberhardus nobis ut judici et eciam obligauit, ex tunc in antea reficere, soluere et integre resarcire eidem monasterio vnacum predictis octo libris soluendis omnia et singula dampna, expensas et interesse, que et quas dominus . . abbas, qui pro tempore fuerit, seu eius procurator ob defectum dicte solucionis aut eius occasione fecisse uel incurrisse dixerit, sine cause cognicione et iudiciali taxacione ac sine alia probacione, et quod nos et quilibet officialis, in officium nostrum subrogatus, sine cause cognicione et sine figura iudicii ipsum et quemlibet suum successorem, ut super re confessatain iudicio, adsoluendum predictum annuum censum debitum constitutum et diu exsolutum statim compellere valeamus ecclesiasticam per censuram, non obstantibus quibuscunque. In quorum omnium euidens testimonium ad ipsius Eberhardi humilem peticionem presentes litteras sigillo officialatus Patauiensis fecimus roborari. Datum et actum Wyenne, tercia die mensis Aprilis, anno domini millesimo trecentesimo nonagesimo primo.

Source Fulltext: HAUSWIRTH, Schotten (=FRA II/18, 1859) S. 426-428