Wir Albrecht von gotes gnaden Hertzog ze Österreich, ze Steyr, ze Kernden vnd ze Krain, graue ze Tyrol etc. Bechennen, daz fur vns kam vnser getrewr Hêrtel Weydner vnd gab vns auf vier gancze Lehen, der zway gelegen sind ze Obern Weyden vnd zway gelegen ze Neydegg mit aller ir zu^egeho^erungen, die sein Lehen von vns waren, als er vns furglegt, vnd pat vns, daz wir die verleihen geru^ochten vnserm getrewn Pernharten dem Weydner von Zaukendorff seim Vettern, wan er im die zu kauffen geben hiet. Das haben wir getan vnd haben demselben Pernharten vnd seinen erben die egenanten Lehen verlihen vnd leihen auch, was wir im zu Recht daran leihen sullen oder mu^egen, von vns vnd vnsern erben in Lehens Rechten inne ze haben vnd ze niessen, als Lehens vnd Lands Recht ist, vngeuerleich. Mit vrchund ditz briefs geben ze Wienn an dem heiligen Auffarttag, nach Kristi gepurd Drewczehenhundert Jar darnach in dem ains vnd newnczigisten Jare.

Source Fulltext: HAUSWIRTH, Schotten (=FRA II/18, 1859) S. 428-429