Ich Hertel der Weydner ze Obern Weyden vnd ich Chunigunt sein hausurow vnd alle vnser erben wir vergehen vnd tun chunt offenleich mit dem brief allen den, die in ansehent oder ho^erent lesen, die nv lebent oder hernach chünftig sind, daz wir mit aller vnser erben guetem willen vnd gunst, mit wolbedachtem muet vnd mit gesambter hant vnd nach vnser nachsten vreunt rat, zu der zeit, do wir es mit recht wol getun mochten, vnd mit vnsers lehenherren hant dez edln hochgeporn fürsten hertzog Albrechts ze Osterreich etc. verchaufft haben vier gantzew lehen, der ligent zwai ze Obern Weyden in dem hof, do der Turn innen leit, vnd zway ze Neydekk, vnd vier Tagwerich wismatz, gelegen ze Obern Weyden zenechst dez Münichs wis von Pavmgarten, vnd daz purchstal halbs in dem alten dorff. Die vorgenanten vier gantzew lehen vnd die vier tagwerich wismatz vnd daz halb purchstal im alten dorff haben wir allez recht vnd redleichen verchaufft vnd geben recht, als wirs zu lehen gehabt haben von vnserm genedigen herren hertzog Albrechten in Österreich etc. mit aller zuegehorung zu veld vnd ze dorff, ez sei gestifft oder vngestifft, vnd darczu uersuecht oder vnuersuecht, swie so daz genant ist, nichts ausgenomen, mit allen den ern, nützen vnd rechten, als wir ez vnuersprochenleichen in lehens gewer herpracht haben vnd ez allez mit alter herchomen ist, vmb hundert phunt vnd czwelf phunt wienner phenning, der wir gantz vnd gar gericht vnd gewert sein, meinem lieben vetern Pernharten dem Weydner ze Zaukendorff vnd allen seinen erben, fürbas ledichleichen vnd freyleichen ze haben vnd allen iren frumen domit zu schaffen, zu verchauffen, versetzen, geben, schaffen vnd machen, wem er wil, an allen irrsal. Vnd sein auch wir, ich obgenanter Hertl der Weydner vnd Chunigunt sein hausurow, vnd alle vnser erben vnuerschaidenleichen der vorgenanten gueter mit aller irr czuegehorung dez egenanten meines lieben vetern Pernharts des Weydner ze Zaukendorff vnd aller seiner erben ir recht gewern vnd scherm fur alle ansprach, als lehen recht ist vnd dez landes recht ze Osterreich. Wêr aber, daz in furbas mit recht an dem vorgenanten guetern icht chriegs oder ansprach auferstund, von swem daz wêr, oder ob in icht daran vnd an alle die, vnd darzu gehört, mit recht abgieng, swas si dez schaden nement, denselben schaden sullen wir in allen ausrichten, ablegen vnd widerchern an alle widerred vnd an allen iren schaden, vnd sullen auch si daz haben auf mir obgenanten Hêrtlein dem Weydner von Obern Weyden vnd auf mir vorgenanten Chunigunden seiner hausurow vnd auf allen vnsern erben vnuerschaidenleichen vnd auf allem vnserm guet, ez sey eribgut oder varund guet, daz wir haben in dem lande ze Österreich, oder wo wir ez haben, wir sein lebentig oder tod. Vnd daz der chauff furbas also stet vnd vnczerbrochen beleib, daruber so geben wir in den brief zu einem offen vrchund vnd warn geczewgen der sache versigelten ich obgenanter Hertel der Weydner ze Obern Weyden für mich vnd für die vorgenanten Chunigunden mein hausurow vnd für vnser erben mit meinen anhangundem Insigel vnd sind geczewgen mein prueder Friedreich vnd Hanns gepru^eder die Weydner vnd mein Öhem Chunrat der Magens von Protezz durch vnser vleizzigen pet willen mit iren anhangunden Insigeln, dem vorgenantem meinem Öhem Chunraten dem Magens an schaden. Der brief ist geben nach Christs gepurd drewczehenhundert Jar darnach in dem ains vnd newnzgistem Jar, dez nechsten Freytags nach vnsers herren Gots auffart Tag.

Source Fulltext: HAUSWIRTH, Schotten (=FRA II/18, 1859) S. 430-432