Ich Wernhart der Weydner ze Obern Weyden vnd alle mein erben vergehen vnd tun chunt offenleichen mit dem brief allen den, die in ansehen oder horent lesen, die nv lebent oder hernach chunftig sind, daz ich mit aller meiner erben guetem willen vnd gunst, mit wolbedachtem muet vnd nach meiner nachesten freunt rat, zu der czeit, do ich ez mit recht wol getun mocht, vnd meines lehenherren hant dez edln hochgeporn fürsten Hertzog Albrechts ze Österreich etc. verchauft han mein halbs lehen, daz ich von seinen genaden czu lehen gehabt han, gelegen ze Obern Weyden czenechst Dietreichs dez Moyker hof, daselb mein vorgenantz halbes lehen han ich recht vnd redleichen verchaufft vnd geben mit alle die, vnd darczue gehört, ze veld vnd ze dorff, ez sey gestifft oder vngestifft, versuecht oder vnuersuecht, swie so daz genant ist, mit allen den ern, nützen vnd rechten, als ich ez vnuersprochen in lehens gewer herpracht han vnd als ez auch mit alter herchomen ist, vmb vier vnd czwainczig phunt wienner phenning, der ich gantz vnd gar gericht vnd gewert pin, meinem lieben vetern Pernharten dem Weydner ze Zaukendorff vnd allen seinen erben fürbas ledichleichen vnd freyleichen ze haben vnd allen iren frumen domit zu schaffen, zu verchauffen, versetzen vnd geben, schaffen vnd machen, swem si wellent, an allen irrsal. Vnd pin auch ich obgenanter Wernhart der Weydner von Obern Weyden vnd alle mein Erben vnuerschaidenleichen dez vorgenanten halben lehens mit aller seiner czuegehörung dez egenanten Pernharts dez Weydner ze Zaukendorff meins vetern vnd aller seiner erben ir recht gewern vnd scherm für alle ansprach, als lehens recht ist vnd des landes recht ze Österreich. Wêr, daz si fürbaz an dem vorgenanten halben lehen vnd an alle die, vnd darzu gehört, mit recht icht chriegs oder ansprach gewunnen, von swem daz wer, oder ob in mit recht daran icht abgieng, swaz si dez schaden nement, daz sullen wir in allez ausrichten, ablegen vnd widerchern an alle widerrede vnd an allen iren schaden, vnd sullen auch si daz haben auf mir obgenanten Wernharten dem Weydner vnd auf allen meinen erben vnuerschaidenleichen vnd auf allem vnserm guet, daz wir haben in dem Lande ze Osterreich oder wo wir daz haben, wir sein lebentig oder tod. Vnd daz der chauff furbas also staet vnd vntzerbrochen beleib, vnd darüber so gib ich in obgenanter Wernhart der Weydner von Obern Weyden für mich vnd für alle mein erben den brief über daz obgenant halb lehen vnd sein zuegehorung, ausgenomen die zwo hofstet ze Obern Weyden, der haben wir in nicht zu chauffen geben, versigelt mit meinem anhangundem Insigel, vnd dez sind geczewgen mein lieb vetern Hanns vnd Hêrtel gepru^eder die Weydner ze Obern Weyden durch meiner vleizzigen pet willen mit iren anhangunden Insigeln, in an schaden. Der brief ist geben nach Christes gepurd drewtzehenhundert Jar darnach in dem ains vnd newnczgistem Jar, dez nechsten Freytags nach vnsers herren gotes auffarttag.

Source Fulltext: HAUSWIRTH, Schotten (=FRA II/18, 1859) S. 429-430