Vniuersis et singulis presentes litteras inspecturis nos frater Michael de Hochsteten prior totusque conuentus claustri fratrum ordinis sancte Marie de monte carmelo Wyenne, Patauiensis diocesis, salutem in eo, qui salus omnium est et uita. Cum serenissimus princeps et dominus dominus Albertus tercius dux Austrie, Styrie, Karinthie etc. de sui largiflua pietate in anime sue ac omnium fidelium magnum remedium ac in subsidium fundacionis noue claustri nostri quasdam domos cum suis attinenciis nobis libere donauisset, inter quas quandam domum Dietrici arcuficis, sitam ex opposito arcuficum Wyenne infra tales confines domorum, videlicet domum quondam dicti Tonnaer retro domum dominorum de Eberstorff parte ex vna, et domum . . sartoris in acie iacentem parte ex altera, quam eciam nobis donauit, ad religiosos viros et dominos . . Abbatem et conuentum monasterii sancte Marie uirginis Scotorum Wyenne ordinis sancti Benedicti, predicte diocesis, spectantem jure fundi, ac eidem monasterio racione fundi in triginta denarios monete Wyennensis annis singulis censualem. Verum quia eandem domum in certum locum et usum claustri nostri deputauimus ac eandem actu possidemus, ne ergo ex hoc antedictum monasterium Scotorum in predicto annuo censu preiudicium aliquod patiatur, nos frater Michael prior totusque conuentus claustri antedicti presencium in tenorem recognoscimus et perpetue nos et successores nostros obligamus et obligatos ostendimus, antedicto monasterio beate Marie Scotorum singulis annis in festo sancti Michaelis predictum annuum censum triginta denariorum jure fundi soluturos et nos soluere debere, quacumque contradictione non obstante. Et si circa dictum terminum singulis annis aut aliquo ipsorum sepedicto monasterio Scotorum predictus annuus census triginta denariorum per nos et successores nostros traditus et exsolutus non fuerit, dummodo commoniti et legitime requisiti fuerimus, quod tunc omnia dampna, expensas et interesse, que et quas dominus abbas, qui tunc pro tempore fuerit, ob defectum dicte solucionis se fecisse et incurrisse dixerit, vnacum neglecto censu resarcire, reficere et soluere debeamus. In quorum omnium euidens testimonium presentes litteras nostris sigillis fecimus roborari. Datum et actum Wyenne anno domini millesimo trecentesimo nonagesimo secundo, in vigilia sancti Georgii martiris gloriosi.

Source Fulltext: HAUSWIRTH, Schotten (=FRA II/18, 1859) S. 432-433