Bonifacius episcopus seruus seruorum dei dilecto filio . . decano ecclesie Patauiensis salutem et apostolicam benediccionem. Piis fidelium votis, illis presertim, que diuini cultus augmentum et animarum salutem respiciunt, libenter annuimus, illaque, quantum cum deo possumus, fauoribus prosequimur oportunis. Exhibita siquidem nobis nuper pro parte dilecti filii nobilis viri Johannis comitis in Hardekk Patauiensis dyocesis peticio continebat, quod ipse, de propria salute recogitans et cupiens terrena in celestia et transitoria in eterna felici commercio commutare, pro sue suorumque progenitorum animarum salute de bonis sibi a Deo collatis in opido suo in Pulka dicte dyocesis in fundo proprio et loco vtique ad hoc congruo et honesto vnam capellam opere solempni inchoatam in honorem et sub uocabulo corporis domini nostri Jesu Christi, absque tamen preiudicio matricis ecclesie, fundare et construi facere ac pro nonnullis perpetuis cappellanis inibi domino perpetuo in diuinis seruituris sufficienter dotare proponat. Quare pro parte ipsius comitis nobis fuit humiliter supplicatum, ut sibi fundandi, perficiendi et construi faciendi capellam huiusmodi illamque, ut prefertur, dotandi licenciam concedere ac ius patronatus eiusdem capelle et presentandi huiusmodi perpetuos capellanos ad eandem sibi ac heredibus et successoribus suis in perpetuum reseruare de benignitate apostolica dignaremur. Nos igitur, eiusdem comitis pium propositum plurimum in domino commendantes, huiusmodi supplicacionibus inclinati, discrecioni tue per apostolica scripta mandamus, quatenus eidem comiti fundandi, perficiendi et construi faciendi cappellam, huiusmodi assignata tamen prius per eum suffïcienti dote pro huiusmodi perpetuis cappellanis inibi domino perpetuo in diuinis seruituris, auctoritate apostolica licenciam largiaris ac nichilominus ius patronatus dicte cappelle et presentandi perpetuos cappellanos ad eandem eidem comiti ac heredibus et successoribus huiusmodi auctoritate predicta in perpetuum reseruare procures, constitucionibus apostolicis et aliis contrariis non obstantibus quibuscumque, jure tamen parrochialis ecclesie et cuiuslibet alterius in omnibus semper saluo. Datum Rome apud sanctum Petrum, XIII. Kl. Maii, Pontificatus nostri anno septimo.

Source Fulltext: HAUSWIRTH, Schotten (=FRA II/18, 1859) S. 445-446